അപ്പൂന്റെ ലോകം

അങ്കിളിനു സ്നേഹപൂർവം.....

2011-01-13T09:55:00.004+05:30

മലയാളം ബ്ലോഗിംഗ് രംഗത്ത് പ്രായം കൊണ്ട് എല്ലാവരുടെയും “അങ്കിൾ” ആയിരുന്ന ശ്രീ. എൻ.പി ചന്ദ്രകുമാർ 2011 ജനുവരി 9 ന് അന്തരിച്ചു. മലയാളം ബ്ലോഗ് വഴി എനിക്ക് കിട്ടിയ നല്ല സുഹൃത്തുക്കളിൽ ഒരാളായിരുന്നു അങ്കിൾ. അദ്ദേഹത്തെപ്പറ്റി ഒരു ചെറിയ ഓർമ്മക്കുറിപ്പാണ് ഈ പോസ്റ്റ്.

ഞാനും അങ്കിളും ഏകദേശം ഒരേ സമയത്താണ് മലയാളം ബൂലോകത്തെക്ക് വന്നതെങ്കിലും അങ്കിളിനെ ആദ്യമായി പരിചയപ്പെടുന്നത് ഒരു വർഷത്തോളം കഴിഞ്ഞതിനു ശേഷമാണ്. ഗൂഗിൾ ചാറ്റിൽകൂടിയായിരുന്നു ആദ്യപരിചയപ്പെടലുകൾ. അതിനുശേഷം ചാറ്റിൽകൂടെയും, മെയിലിൽ കൂടിയും ചിലപ്പോഴൊക്കെ ഫോണിൽ കൂടിയും ആ സൌഹൃദം വളർന്നു. മൂന്നു പ്രാവശ്യം അദ്ദേഹത്തെ നേരിൽ കണ്ടു. ഇപ്പോൾ തിരിഞ്ഞുനോക്കുമ്പോൾ വെറും മൂന്നുവർഷത്തെ പരിചയം മാത്രമേ ഞങ്ങൾ തമ്മിലുള്ളോ എന്നു അതിശയം തോന്നുന്നു. അതിലൊക്കെ എത്രയോ കൂടുതൽ കാലം പരിചയമുള്ളതുപോലെ അദ്ദേഹവുമായി മാനസികമായി അടുത്തിരുന്നു ഇത്രയും കുറഞ്ഞ സമയത്തിനുള്ളിൽ എന്നതാണ് സത്യം.

ഇത് എന്റെ മാത്രം തോന്നലല്ല എന്നെനിക്ക് ഉറപ്പുണ്ട്. അങ്കിളിനെ പരിചയമുള്ള എല്ലാവർക്കും ഇതുതന്നെയാവും പറയാനുള്ളത്. സദാ ചിരിക്കുന്ന മുഖം. ആരെയും ഒരുവിധത്തിലും നോവിക്കാത്ത വർത്തമാനവും മാന്യമായ പെരുമാറ്റവും. "അറുപതുകടന്ന ചെറുപ്പക്കാരൻ" എന്നു തോന്നിപ്പിക്കുന്ന ചുറുചുറുക്കുള്ള പെരുമാറ്റം. അങ്കിളിന്റെ അഥിതികളായെത്തുന്നവർക്ക് ഒരിക്കലും മറക്കാനാവാത്ത ആഥിത്യമര്യാദകൾ. ഒപ്പം ഒരമ്മയുടെ സ്നേഹമസൃണമാ‍യ കരുതലും പെരുമാറ്റവും കൈമുതലായുള്ള അങ്കിളിന്റെ പ്രിയഭാര്യ ചന്ദ്രിക ആന്റിയുടെ സാന്നിധ്യവും കൂടിയാകുമ്പോൾ അങ്കിൾ എന്ന വ്യക്തിയെയും, അദ്ദേഹത്തിന്റെ കുടുംബത്തേയും ആർക്കും മറക്കാനാവില്ല.

ഇന്ന് മലയാളം ബ്ലോഗിംഗ് രംഗത്ത് സജീവമായി നിൽക്കുന്നവരിൽ അറുപതിനുമേൽ പ്രായമുള്ളവർ അധികമുണ്ടെന്നു തോന്നുന്നില്ല. അങ്കിൾ ബ്ലോഗിംഗ് രംഗത്തേക്ക് വന്നത് 2007 ഫെബ്രുവരിയിലാണെന്ന് അദ്ദേഹത്തിന്റെ ബ്ലോഗർ പ്രൊഫൈലിൽ കാണുന്നുണ്ട്. അന്ന് മലയാളം ബ്ലോഗ് വേദി ഇത്രയൊന്നും വളർന്നിരുന്നില്ല, ബ്ലോഗ് ചെയ്യുന്നവരിൽ ഏറെയും ചെറുപ്പക്കാരും. അതുകൊണ്ടാവാം “അങ്കിൾ” എന്ന തൂലികാ നാമം അദ്ദേഹം അന്ന് തെരഞ്ഞെടുത്തത്. പക്ഷേ അതിനും വളരെ മുമ്പു തന്നെ കമ്പ്യൂട്ടറും മലയാളവുമായ അദ്ദേഹത്തിന്റെ ബന്ധം ആരംഭിച്ചിരുന്നു. അക്കഥ അങ്കിൾ തന്നെ അദ്ദേഹത്തിന്റെ ഒരു പോസ്റ്റിൽ പറയുന്നുണ്ട്. ചുരുക്കത്തിൽ അതിവിടെ എഴുതാം.

1986 കാലഘട്ടത്തിൽ കമ്പ്യൂട്ടറും മലയാളം എഴുത്തും ഒന്നും സാധാരണ മലയാളിക്ക് അത്ര പരിചയമില്ല. അന്ന് സ്പെക്ട്രം പ്ലസ് എന്ന കമ്പ്യൂട്ടറിന്റെ പ്രാഗ്‌രൂപം ഉപയോഗിച്ച് വീഡിയോ ടൈറ്റിലുകൾ ഉണ്ടാക്കുന്നതിൽ കമ്പം കയറിയാണ് അങ്കിളും അദ്ദേഹത്തിന്റെ സുഹൃത്തായ ശ്രീ.കെ.ജി നാരായണൻ നായരും ചേർന്ന് വീഡിയോ ടൈറ്റിലിംഗിൽ മലയാളം അക്ഷരങ്ങൾ ഉപയോഗിക്കുവാനുള്ള സാങ്കേതികവിദ്യ ഉണ്ടാക്കിയെടുത്തത്. ഒരു പക്ഷേ ഇന്ത്യയിൽ തന്നെ മലയാള അക്ഷരങ്ങൾ ഒരു കമ്പ്യൂട്ടറിൽ തെളിയുന്നത് ആ പരീക്ഷണത്തിൽ വച്ചായിരിക്കാം എന്ന് അങ്കിൾ തന്നെ പറയുന്നുണ്ട്. 1986 മെയ് 18 നു മാതൃഭൂമിയിൽ വന്ന ഈ റിപ്പോർട്ട് നോക്കൂ (ലിങ്കിൽ ക്ലിക്ക് ചെയ്താൽ ഒറിജിനൽ പത്രവാർത്ത കാണാം).

മുപ്പത്തൊൻപതു വർഷം നീണ്ട അങ്കിളിന്റെ ഔദ്യോകിക ജീവിതം സർക്കാരിന്റെ അക്കൌണ്ട്സ് ജനറൽ (AG) ഓഫീസിൽ ആയിരുന്നു - അക്കൌണ്ട്സ് ഓഫീസർ എന്ന പദവിയുടെ വിവിധ തലങ്ങളിൽ. Institute of Public Auditors, India (IPAI) ലെ അംഗം. ഭാരതത്തിലെ ഏത് പൊതുമേഖലാ സ്ഥാപനത്തിലേയും കണക്കുകള്‍ പരിശോധിക്കുവാന്‍ യോഗ്യൻ. നാലു വർഷം കേരളസംസ്ഥാന സര്‍ക്കാരിന്റെ Internal Audit Board ൽ അതിന്റെ സ്ഥാപക സെക്രട്ടറിയായി പണി ചെതു. അതിനുശേഷം അക്കൌണ്ടന്റ് ജനറല്‍ ഓഫീസിൽ തിരിയെ പോയി സംസ്ഥാന സർക്കാരിന്റെ വരവുചെലവു കണക്കുകളും ബാലന്‍സ് ഷീറ്റും [Finance and Appropriation accounts] നിര്‍മ്മിക്കുന്നതിനു നേതൃത്വം കൊടുത്തു. അവസാനത്തെ 3 വർഷം വീണ്ടും സംസ്ഥാന സര്‍ക്കാരിലേക്ക്. അവിടുത്തെ ട്രഷറികള്‍ കമ്പ്യൂട്ടറൈസ് ചെയ്യുന്നതിനു വേണ്ടി അഡിഷനല്‍ സെക്രട്ടറി പദവിക്ക് തുല്യമായ Systems Manager ആയിട്ടും പണിയെടുത്തു. ആ പദവിയിലിരിക്കുമ്പോഴായിരുന്നു റിട്ടയർമെന്റ്.

തിരുവനന്തപുരം ബ്ലോഗേഴ്സ് ക്ലബിൽ അങ്കിൾ സജീവമായിരുന്നു ആദ്യകാലം മുതൽ തന്നെ. “സർക്കാർ കാര്യം” “ഉപഭോക്താവ്” എന്നീ രണ്ട് ബ്ലോഗുകളിൽ കൂടി അദ്ദേഹം ഒരുപാടൊരുപാട് പോസ്റ്റുകൾ എഴുതിയിട്ടുണ്ട്. പ്രത്യേകിച്ചും സർക്കാർ കാര്യം എന്ന ബ്ലോഗിൽ അദ്ദേഹം കൈകാര്യം ചെയ്തിരുന്ന വിഷയങ്ങൾ സർക്കാരിലെ വിവിധ വകുപ്പുകളിൽ നടക്കുന്ന / നടന്ന അഴിമതിക്കഥകളായിരുന്നു. അഴിമതികളെപ്പറ്റി വെറുതേ കുറച്ച് ആരോപണങ്ങൾ ഉന്നയിക്കുകയായിരുന്നില്ല അങ്കിൾ ചെയ്തത്. ഓരോ പോസ്റ്റിനു പിന്നിലും വിശദമായ പഠനവും, അതിനു മതിയായ രേഖകളും അദ്ദേഹം സംഘടിപ്പിച്ചിരുന്നു. ഒരു പോസ്റ്റിലും അദ്ദേഹം ആരുടെയും പക്ഷം പിടിച്ചില്ല, നിഷ്പക്ഷമായി തന്നെ കാര്യങ്ങളെ വിശകലനം ചെയ്തു. വിവരാവകാശ നിയമം ഒരു പൌരനു നൽകുന്ന അവകാശങ്ങൾ ഉപയോഗിച്ചായിരുന്നു പല രേഖകളും അദ്ദേഹം സംഘടിപ്പിച്ചിരുന്നത്. 2ജി സ്പെക്ട്രം അഴിമതിയെപ്പറ്റിയുള്ള ഒരു ലേഖനപരമ്പര അദ്ദേഹം തുടങ്ങിവച്ചിരുന്നു. അത് പൂർത്തിയാക്കാൻ സാധിക്കുന്നതിനു മുമ്പാണ് അദ്ദേഹത്തിന്റെ ആകസ്മിക മരണം. മലയാളം ബ്ലോഗിംഗ് രംഗത്ത് ഈ രീതിയിലൊരു ഒറ്റയാൾ പടനയിക്കുവാൻ ഇനി മറ്റൊരാൾ വരേണ്ടിയിരിക്കുന്നു.

ബ്ലോഗ് എഴുതുന്നതിൽ മാത്രമല്ല, മറ്റുള്ളവരുടെ ബ്ലോഗ് പോസ്റ്റുകൾ വായിക്കുന്നതിനും അദ്ദേഹം ധാരളം സമയം കണ്ടെത്തി. റിട്ടയർമെന്റ് ജീവിതത്തിൽ ലഭിച്ച സമയത്തിന്റെ ഏറിയ പങ്കും അങ്കിൾ ബ്ലോഗിംഗ് രംഗത്താണ് ചെലവാക്കിയതെന്ന് നിസംശയം പറയാം. അതുവഴി അദ്ദേഹത്തിനു വലിയൊരു സുഹൃദ്‌വലയവും ഉണ്ടായി - സമപ്രായക്കാരും ചെറുപ്പക്കാരും ഉൾപ്പടെ. ബ്ലോഗ് മീറ്റുകൾ സാധാരണമല്ലാഞ്ഞ അക്കാലത്ത് (2007 നവംബറിൽ) അങ്കിളിന്റെ വീട്ടിൽ തന്നെ ഒരു ബ്ലോഗ് മീറ്റും അദ്ദേഹം സംഘടിപ്പിച്ചു.

2008 ആദ്യമാസങ്ങളിൽ ഞാൻ ആദ്യാക്ഷരി ബ്ലോഗിന്റെ പണിപ്പുരയിൽ ആയിരുന്ന സമയം. അന്ന് അങ്ങനെയൊരാശയം ഞാൻ മുമ്പോട്ട് വയ്ക്കുമ്പോൾ തന്നെ അങ്കിൾ വളരെയധികം പ്രോത്സാഹിപ്പിച്ചിരുന്നു, ചെറിയ നിർദ്ദേശങ്ങൾ തന്നിരുന്നു. ആദ്യാക്ഷരിയുടെ ഇരുപതോളം അദ്ധ്യായങ്ങൾ പൂർത്തിയായ സമയത്താണ് തിരുവനന്തപുരം ബ്ലോഗേഴ്സ് ക്ലബും, കേരള ബ്ലോഗ് അക്കാഡമിയും ചേർന്ന് സംയുക്തമായി ഒരു ബ്ലോഗ് ശില്പശാല തിരുവനന്തപുരത്ത് 2008 ജൂൺ ഒന്നാം തീയതി നടത്തുവാൻ തീരുമാനിച്ചത്. ആ വേദിയിൽ വച്ച് ആദ്യാക്ഷരി ബ്ലോഗിനെ പൊതുജനസമക്ഷം അവതരിപ്പിക്കാമോ എന്ന് ഞാൻ അങ്കിളിനോട് മടിച്ചുമടിച്ചാണ് ചോദിച്ചത്. പക്ഷേ അദ്ദേഹം സന്തോഷപൂർവം അത് അംഗീകരിച്ചു. അങ്ങനെയാണ് നിങ്ങളിൽ പലരും ഇപ്പോൾ ബ്ലോഗ് സംശയനിവാരണത്തിനായി നോക്കിയേക്കാവുന്ന ആദ്യാക്ഷരി ബ്ലോഗ് ഔദ്യോകികമായി ആഗ്രിഗേറ്ററുകളിൽ വരാൻ തുടങ്ങിയത്. ആദ്യാക്ഷരിയുമായുള്ള അങ്കിളിന്റെ ബന്ധം അവിടെ തീർന്നില്ല. അതിൽ നിന്നുള്ള കമന്റുകൾ അദ്ദേഹം പ്രത്യേകമായി അദ്ദേഹത്തിന്റെ മെയിലിലേക്ക് വരുത്തിയിരുന്നു. എന്തെങ്കിലും തിരക്കുകൾ കാരണം ഞാൻ ഏതെങ്കിലും വായനക്കാരന്റെ ചോദ്യങ്ങൾക്ക് മറുപടി നൽകുവാൻ താമസിച്ചാൽ അങ്കിൾ അതിന്റെ മറുപടിയും പലപ്പോഴും നൽകിയിരുന്നു.

അങ്കിളിനെ ഞാൻ നേരിൽ കാണുന്നത് 2008 ജൂലൈമാസത്തിൽ നാട്ടിൽ അവധിക്കുപോയപ്പോഴായാരുന്നു. തിരുവനന്തപുരത്തെ വീട്ടിലേക്ക് കുടുംബസമേതം വരൂ, കുട്ടികളേയും കൂട്ടി ഒരുദിവസം മുഴുവൻ ഉല്ലാസയാത്രാവാം എന്ന സ്നേഹപൂർവമുള്ള ക്ഷണം നിരസിക്കാനായില്ല. ദീപയേയും കുട്ടികളേയും കൂട്ടി ഒരു ദിവസം അങ്കിളിന്റെ വീട്ടിലേക്ക് പോയി; ഒപ്പം ദീപയുടെ സഹോദരൻ ദിലീപും. അങ്കിളുമായി നേരിൽ പരിചയമില്ല, ചാറ്റിലും മെയിലിലും മാത്രം പരിചയമുള്ള അദ്ദേഹത്തിന്റെ വീട്ടിലേക്ക് ചെല്ലുമ്പോൾ ഒരല്പം സങ്കോചം ഇല്ലാതിരുന്നില്ല! വട്ടിയൂർക്കാവിലെ അദ്ദേഹത്തിന്റെ “ചാന്ദ്നി” എന്ന വീട്ടിലെത്തുമ്പോൾ വീട്ടു പടിക്കൽ തന്നെ നിറഞ്ഞചിരിയുമായി അങ്കിൾ നിൽക്കുന്നുണ്ടായിരുന്നു. ഒപ്പം അങ്കിളിന്റെ ഭാര്യ ചന്ദ്രകുമാരി എന്ന ആന്റിയും. ആന്റി എന്ന് അവരെ സംബോധന ചെയ്യുമ്പോൾ തന്നെ അങ്കിൾ സ്നേഹപൂർവം തിരുത്തി, അതുവേണ്ട അമ്മ എന്നു വിളിച്ചുകൊള്ളൂ എന്ന് - ശരിയാണ് എന്റെ അമ്മയുടെ പ്രായം തന്നെ ആന്റിക്കും. ഞങ്ങളെല്ലാവരും അന്നുമുതൽ ആന്റിയെ “അമ്മ” എന്നുതന്നെയാണ് വിളിക്കാറ്. കുട്ടികൾ അവരെ രണ്ടുപേരെയും അപ്പൂപ്പൻ / അമ്മൂമ്മ എന്നും വിളിച്ചു. വീടിന്റെ ഒന്നാം നിലയിലെ ഒരു മുറി ഞങ്ങൾക്കായി ഒരുക്കിയിട്ടിരുന്നു അങ്കിളും അമ്മയും. അധികനേരമൊന്നും വേണ്ടിവന്നില്ല വളരെനാളത്തെ പരിചയക്കാരെപ്പോലെ ഞങ്ങളെല്ലാവരും ആയിത്തിരുവാൻ.

ഒരു ദിവസം മുഴുവൻ നീളുന്ന യാത്രക്കായി അങ്കിളും അമ്മയും റെഡിയായി ഇറങ്ങി. തിരുവനന്തപുരം ഒന്നോടിക്കാണുക. കുട്ടികളെ മൃഗശാലയും മ്യൂസിയവും കാണിക്കുക, അതിനുശേഷം കോവളം വരെ പോയി തിരിച്ചു പോരുക. ഇതായിരുന്നു പ്ലാൻ. അങ്കിളൂം അമ്മയും ഒരു കാറിലും ഞങ്ങൾ ഞങ്ങൾ വന്ന കാറിലുമായി യാത്ര തുടങ്ങി. കുറേനേരം കഴിഞ്ഞാണ് എനിക്ക് മനസ്സിലായത് ഞങ്ങളോടൊപ്പം “ഓടിച്ചാടി” നടക്കുന്ന ഈ മനുഷ്യൻ ഒരു ബൈപ്പാസ് സർജറിയും കഴിഞ്ഞ്, ഡയബറ്റിസിനുള്ള മരുന്നുകളുമായി കഴിയുന്ന ആളാണെന്ന്.

കോവളത്ത് എത്തി കടലുകണ്ടപ്പോൾ അങ്കിൾ മറ്റൊരു കുട്ടിയായി മാറി കുട്ടികളോടോപ്പം കളിക്കുന്നതാണ് ഞാൻ കണ്ടത് ! അദ്ദേഹത്തിന്റെ ചിട്ടയായ ജീവിതക്രമവും, ആഹാരം മരുന്നുകൾ, വ്യായാമം എന്നിവയിലുള്ള നിഷ്ടകളുമാണ് ഇങ്ങനെ ങ്കിലും നടക്കാൻ സാധിപ്പിക്കുന്നത് എന്ന് അങ്കിൾ കൂടെക്കൂടെ പറയുമായിരുന്നു. ഒപ്പം കൂട്ടിചേർക്കാൻ മറ്റൊന്നുകൂടി എനിക്ക് പറയാനുണ്ട് - ചിരിക്കുന്ന മനസും, എല്ലാറ്റിനേയും പോസിറ്റീവാ‍യി എടുക്കാനുള്ള കഴിവും അദ്ദേഹത്തിന്റെ പ്രത്യേകതയായിരുന്നു.

വീണ്ടും ഞങ്ങൾ തമ്മിൽ കാണുന്നത് ചെറായി ബ്ലോഗേഴ്സ് മീറ്റിൽ വച്ചാണ്; 2009 ൽ. അന്നും രഅങ്കിളും ആന്റിയും കൂടിയാണ് ചെറായിയിൽ വന്നത്. ഒരു ദിവസം അവിടെ താമസിച്ച് പിറ്റേന്നാണ് അവർ തിരികെ പോയത്. കൈയിലൊരു വീഡിയോ ക്യാമറയുമായി അവിടെയെല്ലാം ഓടിനടന്ന അങ്കിൾ മീറ്റിൽ നിറഞ്ഞുനിന്നു എന്നു തന്നെപറയാം!

അതു കഴിഞ്ഞ് ഒരിക്കൽ കൂടി അങ്കിളിനെ കാണുവാൻ ഞാൻ പോയിരുന്നു. ആ യാത്രയിലാണ് യാരിദ്, വെള്ളെഴുത്ത്, എന്റെ അനുജൻ ഷിജു, അങ്കിൾ എന്നിവരോടൊപ്പം തിരുവനന്തപുരത്തെ കുതിരമാളിക കാണുവാൻ പോയത്. അന്നും ഒരു പകൽ മുഴുവൻ യാതൊരു മുഷിച്ചിലും ഇല്ലാതെ അങ്കിൾഞങ്ങളോടൊപ്പം വന്നു.

പിന്നീട് പലപ്പോഴും ഫോണിലും ചാറ്റിലുമെല്ലാം ഞങ്ങൾ സംസാരിച്ചു. എപ്പോഴും കുടുംബത്തിലെ ഒരു കാരണവരെപ്പോലെയായിരുന്നു അദ്ദേഹത്തിന്റെ പെരുമാറ്റം. കുട്ടികൾക്ക് പഠനത്തിനു സഹായകരമായേക്കാവുന്ന ഗൈഡുകളും, സി.ഡികളും മറ്റും നാട്ടിൽ നിന്ന് വാങ്ങിതരുന്നതിനും അദ്ദേഹം ശ്രദ്ധിച്ചിരുന്നു.

മരണം നമ്മുടെ ജീവിതത്തിലേക്ക് കടന്നുവരുന്നത് എപ്പോഴാണെന്ന് ആർക്കും പ്രവചിക്കാനാവില്ലല്ലോ. ചിലപ്പോൾ അടുത്ത നിമിഷത്തിലാവാം, അങ്കിളും ഇത് കൂടെക്കൂടെ പറയുമായിരുന്നു. ഡയബറ്റിസ് അദ്ദേഹത്തെ വല്ലാതെ അലട്ടിയിരുന്നു ഈ അടുത്തകാലത്ത്. ബൈപ്പാസ് സർജറിയും ഡയബറ്റിസ് സംബന്ധിയായ രോഗങ്ങളും ഉള്ളവർക്ക് ഓരോ ദിവസവും ഒരു ബോണസ് ആണെന്നും അത് സന്തോഷത്തോടെ ആസ്വദിച്ച് ജീവിക്കുക എന്നതിലാണ് കാര്യം എന്നായിരുന്നു അങ്കിളിന്റെ പക്ഷം. എങ്കിലും ഇത്രയും ചിട്ടയായി ഭക്ഷണക്രമവും മരുന്നുകളും കൈകാര്യം ചെയ്യുന്ന ആരോഗ്യവാ‍നായ ഒരാൾ ഇത്രവേഗം കടന്നുപോകുമെന്ന് ഞാൻ പ്രതീക്ഷിച്ചിരുന്നില്ല.

ഇക്കഴിഞ്ഞ ആഴ്ചയിൽ ഞാൻ ചെറിയ ഒരു അവധിയിൽ ഒരാഴ്ചത്തേക്ക് നാട്ടിൽ പോയിരുന്നു. ജനുവരി ഒൻപതാം തീയതി വൈകിട്ട് അങ്കിളിനെ ഫോണിൽ ബന്ധപ്പെടാൻ നോക്കിയെങ്കിലും കിട്ടിയില്ല. പക്ഷേ അപ്പോൾ എനിക്കറിയില്ലായിരുന്നു അദ്ദേഹം എന്നത്തേക്കുമായി ഈ ലോകത്തോട് യാത്രപറഞ്ഞിരുന്നു എന്ന്. പിറ്റേന്ന് തിരികെ ദുബായിയിലേക്ക് പോരാൻ എയർപോർട്ടിലേക്ക് പോകും വഴി ഷാജി മുള്ളൂക്കാരനാണ് ആ ദുഃഖവാർത്ത എന്നെ ഫോണിൽ അറിയിച്ചത് - “നമ്മുടെ അങ്കിൾ മരിച്ചുപോയി, ഇന്നലെ വൈകിട്ട്“. ഒരു ഞെട്ടലോടെയാണ് കേട്ടത്. ഞങ്ങൾ എല്ലാവരും തിരുവനന്തപുരത്തായിരുന്നിട്ടുകൂടി അപ്പോൾ വട്ടിയൂർക്കാവു വരെ പോകാനാവുന്ന സാഹചര്യമല്ലായിരുന്നു. ഇവിടെ എത്തിയതിനു ശേഷം അമ്മയെ വിളിച്ചു. വളരെ പെട്ടന്നായിരുന്നു അദ്ദേഹത്തിന്റെ അന്ത്യം. കുളിക്കുവാൻ കയറി കുറേസമയമായിട്ടും ആൾ പുറത്തുവരുന്നില്ലല്ലോ എന്നതു ശ്രദ്ധിച്ച് വാതിൽ തുറന്നുനോക്കുമ്പോഴേക്കും അദ്ദേഹം വിടപറഞ്ഞിരുന്നു - നിശബ്ദമായ ഹാർട്ട് അറ്റാക്ക്. പതിവുപോലെ അതാതുദിവസം തീർക്കേണ്ട എല്ലാ ജോലികളും പൂർത്തിയാക്കിയാണ് അന്നും അങ്കിൾ പോയത്.

നമ്മുടെയെല്ലാം ജീവിതത്തിൽ നാം വളരെയധികം സ്നേഹിക്കുന്നവരും നമ്മളെ വളരെയധികം സ്നേഹിക്കുന്നവരുമായ വ്യക്തികൾ ഉണ്ടാവുമല്ലോ. എന്റെ കാര്യം നോക്കിയാൽ, എനിക്ക് വളരെയധികം സ്നേഹം തന്നിരുന്ന ഒരു വ്യക്തിയായിരുന്നു അങ്കിൾ എന്നതിൽ എനിക്ക് യാതൊരു സംശയവുമില്ല. അങ്കിൾ .. ആ സ്നേഹത്തിനു മുമ്പിൽ ആദരവോടെ നിർത്തട്ടെ.

ഹർത്താൽ ദിന ചിന്തകൾ

2010-04-27T08:17:00.002+05:30

വിലക്കയറ്റത്തിനെതിരേ ഇന്ന് “അഖിലേന്ത്യാ” ഹർത്താൽ നടത്തുന്ന രാഷ്ട്രീയപ്പാർട്ടികളോട് ചില ചോദ്യങ്ങൾ:

1. ഈ വർഷം കേരളത്തിൽ നടത്തപ്പെടുന്ന എത്രാമത്തെ ഹർത്താലാണിത്?

2. ഇതുവരെ നടത്തിയ ഹർത്താലുകളിൽ ഏതെങ്കിലും ഒരെണ്ണം, അത് എന്തുദ്ദേശത്തിൽ നടത്തിയോ അത് സാധിച്ചു കിട്ടുന്നതിൽ വിജയിച്ചിട്ടുണ്ടോ? ഇന്നത്തെ ഹർത്താൽ മൂലം അവശ്യ സാധനങ്ങളുടെ വിലകുറയും എന്നു കരുതാമോ? നാളെമുതൽ വേണ്ടാ, ഒരാഴ്ചകഴിഞ്ഞെങ്കിലും?

3. “അഖിലേന്ത്യാ“ ഹർത്താലുകൾ കേരളം, ബംഗാൾ തുടങ്ങിയ ചുരുക്കം ചില സംസ്ഥാനങ്ങളിൽ മാത്രം ജനങ്ങൾ അടങ്ങിയൊതുങ്ങി വീട്ടിലിരുന്ന് ഒരു അവധിയായി ആഘോഷിക്കുമ്പോൾ ഇന്ത്യയിലെ മറ്റു നഗരങ്ങളിലും പ്രദേശങ്ങളിലും അവ യാതൊരു ചലനവും ഉണ്ടാക്കാത്തത് എന്തുകൊണ്ടാണ്? അവിടുത്തെ ജനങ്ങൾക്ക് ബോധമില്ലാത്തതുകൊണ്ടോ?

4. മിഡിൽ ക്ലാസ് ഭൂരിപക്ഷം ഉള്ള കേരളം പോലെ ഒരു സംസ്ഥാനത്ത് ജനങ്ങൾ ഹർത്താലിനെ ഒരു പൊതുഅവധി എന്ന രീതിയിൽ കാണുന്നു എന്നത് സത്യമല്ലേ? ഇവിടെ സ്ഥിരമായ ജോലിയും മാസശമ്പളവും ഉള്ള ആളുകൾ ഹർത്താൽ ദിനം ഒരു അവധിയായി ആഘോഷിക്കുമ്പോൾ, ദിവസക്കൂലിക്കാരന്റെ ഒരു ദിവസത്തെ വരുമാനം ഇല്ലാതാവുകയല്ലേ ഹർത്താൽ നടത്തുന്നതു വഴി സംഭവിക്കുന്നത്?

5. പ്രതിഷേധവും എതിർപ്പും ഭരണാധികാരികളെ അറിയിക്കുവാൻ ഈ ആധുനിക യുഗത്തിൽ ഹർത്താലും ബന്ദും അല്ലാതെ മറ്റു സമര രീതികൾ ഇല്ലേ? അവ അനുവർത്തിച്ചാലും ഇതേ ഫലം ഉണ്ടാവുകയില്ലേ? ജനങ്ങൾ പരിക്ക് പേടിച്ച് വീട്ടിലിരിക്കുന്നതിനെ ഹർത്താലിന്റെ വിജയമായി കണക്കാക്കുന്നത് പൊള്ളത്തരമല്ലേ?

6. ഹർത്താലിന്റെ പേരിൽ പൊതുമുതൽ നശിപ്പിക്കുന്നതിനേയും ഒരു പ്രവർത്തി ദിവസം പൂർണ്ണമായും നഷ്ടപ്പെടുത്തുന്നതുമൂലമുണ്ടാകുന്ന ദേശീയ നഷ്ടത്തേയും എങ്ങനെ ന്യായീകരിക്കാം? ടൂറിസം എന്നൊരു സംഗതി കേരളത്തിന്റെ വരുമാന മാർഗ്ഗമാണല്ലോ. അത് അന്വേഷിച്ച് വിദേശത്തുനിന്നും ഇവിടെ എത്തുന്നവർക്ക് ഈ ഹർത്താൽ ഉണ്ടാക്കുന്ന പ്രയാസങ്ങളും, അവർ ഈ ഒരൊറ്റക്കാരണത്താൽ അവരുടെ നാട്ടിൽ നിന്ന് ഇങ്ങോട്ട് വരാൻ പ്ലാനിടുന്നവരെ നിരുത്സാഹപ്പെടുത്തുന്നതും നിങ്ങൾക്ക് അറിയാമോ?

7. ഹർത്താൽ വേണോ വേണ്ടയോ എന്ന് ഒരു അഭിപ്രായ സർവ്വേ നടത്തിയാൽ എത്ര ശതമാനം ജനങ്ങൾ (കേരളത്തിൽ) അതിനെ അനുകൂലിക്കും എന്നാണ് രാഷ്ട്രീയപ്പാർട്ടികൾ വിശ്വസിക്കുന്നത്? ജനങ്ങൾക്ക് വേണ്ടാത്ത ഒരു സമരരീതി വേണ്ടാ എന്നുവയ്ക്കാൻ രാഷ്ട്രീയപ്പാർട്ടികളുടെ നേതൃത്വങ്ങൾ ധൈര്യപൂർവ്വം തീരുമാനമെടുക്കുമോ?

8. വിലകുറയ്ക്കാനുള്ള ഒരു വഴി അവശ്യസാധനങ്ങൾ വിപണിയിൽ ആവശ്യത്തിനു ലഭ്യമാക്കുകയാണ്. ഏറ്റവും കുറഞ്ഞത് അരിയും പച്ചക്കറികളുമെങ്കിലും കേരളത്തിൽ കൃഷിചെയ്യാനുള്ള ഒരു പദ്ധതിയോ, പരിപാടിയോ കുറഞ്ഞത് ഒരു വാക്കെങ്കിലുമോ നിങ്ങളാരും ജനങ്ങളോടൊപ്പം ചേർന്ന് ചെയ്യാത്തത് എന്താണ്?

9. തൊട്ടതിനും പിടിച്ചതിനും ഹർത്താൽ നടത്തി നടത്തി, ആ ഒരു സമരമുറയുടെ അന്തഃസത്ത തന്നെ കളഞ്ഞുകുളിച്ചു എന്ന് ആരെങ്കിലും കരുതിയാൽ അവരെ കുറ്റം പറയാനാവുമോ?

10. ഹർത്താലുകളില്ലാത്ത ഒരു കേരളം സ്വപ്നം കാണാനാവുമോ? സ്വപ്നം കാണുന്നതിനെന്താ കുഴപ്പം, അല്ലേ !! പ്രവർത്തിയിലൂടെ

ചാനൽ വടംവലിയും ഒടിഞ്ഞ കപ്പും

2010-01-18T08:42:00.006+05:30

ഒരാഴ്ചയായി നടന്നുവന്ന സംസ്ഥാന സ്കൂൾ കലോത്സവം വിജയകരമായി സമാപിച്ചപ്പോൾ അധികം ശ്രദ്ധിക്കപ്പെടാതെ (അല്ലെങ്കിൽ ചിലരെങ്കിലും മനഃപ്പൂർവ്വം ശ്രദ്ധിപ്പിക്കാതെ മറച്ച) ഒരു വാർത്ത ഇന്നലെ മലയാള മനോരമ പത്രത്തിൽ പ്രസിദ്ധീകരിച്ചിരുന്നു. ലിങ്ക് ഇവിടെ. വാർത്ത ഇങ്ങനെയായിരുന്നു.

സ്വര്‍ണക്കപ്പിനായി ചാനലുകളുടെ പിടിവലി; കപ്പ് രണ്ടുകഷണം

കോഴിക്കോട്: കലോല്‍സവ വിജയികളുടെ സ്വര്‍ണക്കപ്പിനായി ടിവി ചാനലുകള്‍ തമ്മില്‍ മാനാഞ്ചിറയില്‍ അടിയും പിടിവലിയും. ജേതാക്കളെ ബലമായി തട്ടിക്കൊണ്ടുപോയി ഓഫിസിലിരുത്താന്‍ ചാനലുകാര്‍ നടത്തിയ തെരുവു യുദ്ധത്തിനിടെ ജേതാക്കള്‍ക്കു നല്‍കിയ കപ്പ് രണ്ടായി ഒടിഞ്ഞു.

കലോല്‍സവ വേദിയില്‍ ഒന്നാം സ്ഥാനക്കാര്‍ക്കു നല്‍കിയ സ്വര്‍ണക്കപ്പിന്റെ മാതൃകയാണു ചാനലുകളുടെ പിടിവലിയില്‍ രണ്ടു കഷണമായത്. ഇതിനിടെ ചാനല്‍ യുദ്ധം പൊതുജനങ്ങള്‍ ഏറ്റെടുത്തതോടെ കലോല്‍സവ സമാപനം സംഘര്‍ഷത്തിലേക്കു നീങ്ങി. പൊലീസ് പാടുപെട്ടാണ് രംഗം ശാന്തമാക്കിയത്. ചിലര്‍ ചാനല്‍ ഓഫിസ് കയ്യേറാന്‍ ശ്രമിച്ചതും സംഘര്‍ഷത്തിനിടയാക്കി.

'സ്വര്‍ണ കപ്പുമായി വേദിക്കു വെളിയിലെത്തിയ കോഴിക്കോട് ടീം അംഗങ്ങളെ ആദ്യം സ്റ്റുഡിയോയില്‍ എത്തിച്ചു 'ചരിത്രം എഴുതാനാണ് റിപ്പോര്‍ട്ടര്‍മാരും ചാനല്‍ ജീവനക്കാരും നിലമറന്ന തെരുവുയുദ്ധം നടത്തിയത്. മലയാളത്തിലെ 'ആദ്യ സമ്പൂര്‍ണ ന്യൂസ് ചാനലിലേക്കു സ്വര്‍ണ കപ്പ് എത്തിക്കാനുള്ള ശ്രമം പാര്‍ട്ടി ചാനലിന്റെ റിപ്പോര്‍ട്ടര്‍മാര്‍ ഇടപെട്ടു തടഞ്ഞു. പിടിവലിയില്‍ റിപ്പോര്‍ട്ടര്‍മാരും ചാനല്‍ ജീവനക്കാരും നിലത്തുവീണു. പാര്‍ട്ടിക്കാരുടെ കൈക്കരുത്തിനു മുന്നില്‍ ഒടുവില്‍ എതിര്‍ ചാനല്‍ കീഴടങ്ങി. ഉടന്‍തന്നെ പാര്‍ട്ടി ചാനല്‍ റിപ്പോര്‍ട്ടര്‍ പ്രഖ്യാപിച്ചു, 'സുവര്‍ണ കപ്പ് ആദ്യം ഞങ്ങളുടെ ചാനലില്‍.

അപ്പോഴേക്കു മൂന്നാമതൊരു ചാനല്‍ ക്യാമറാമാന്‍ കൂടി 'നിര്‍ഭയം കപ്പില്‍ പിടിത്തമിട്ടതോടെ കപ്പു പൊട്ടി. ഈ സമയമാണു നാട്ടുകാര്‍ ഇടപെട്ടത്.

ഒടിഞ്ഞ കപ്പിന്റെ കിട്ടിയ പാതിയുമായി റിപ്പോര്‍ട്ടര്‍മാര്‍ കുട്ടികളെ സ്റ്റുഡിയോയില്‍ എത്തിച്ച് ആദ്യം വാര്‍ത്ത ജനങ്ങള്‍ക്കു നല്‍കിയതിന്റെ അവകാശം ഏറ്റെടുത്തു. കപ്പു കിട്ടാത്തവര്‍, 'ഈ ചാനല്‍ മല്‍സരത്തില്‍ ബലം പിടിക്കാനും തട്ടിക്കൊണ്ടു പോകാനും ഞങ്ങളില്ലെന്നു പരസ്യ പ്രഖ്യാപനം നടത്തി അടിയില്‍നിന്നു പിന്‍മാറി. കോഴിക്കോട് ഉല്‍സവമായി നെഞ്ചേറ്റിയ കലോല്‍സവം നാണംകെട്ട ചാനല്‍ മല്‍സരത്തില്‍ നിറംകെട്ട സമാപനത്തിനു സാക്ഷിയാകേണ്ടി വന്നു.

അമൃത ടിവി, ജയ്ഹിന്ദ് ന്യൂസ്, മനോരമ ന്യൂസ് എന്നിവയും മറ്റു പ്രാദേശിക ചാനലുകളും തെരുവുയുദ്ധത്തില്‍നിന്നു വിട്ടുനിന്നു.

ഇതിൽ മനോരമയുടെ റിപ്പോർട്ടിംഗിന്റെ സ്വതസിദ്ധമായ ശൈലി ഉണ്ടെങ്കിലും സംഗതി സത്യമായിരുന്നു. അങ്ങനെ നാണംകെട്ട ഒരു ചാനൽ കിടമത്സരം കൂടി കാണുവാൻ കേരളീയർക്ക് ഭാഗ്യം സിദ്ധിച്ചു! കേരളത്തിലെ ടി.വി ചാനലുകളുടെ തീരെ അപക്വമായ സമീപനത്തിന്റെയും മത്സരബുദ്ധിയുടെയും ഏറ്റവും പുതിയ ഉദാഹരണം. ഇതിനുമുമ്പും പലതവണ ബ്ലോഗിൽ ഇതേ രീതിയിലുള്ള ചാനൽ പ്രവർത്തന രീതിയെ പട്ടിവിളി വിവാദവേളയിലും, പുലിയിറങ്ങിയപ്പോഴും, കാഷ്വാലിറ്റികൾ ആഘോഷിച്ചപ്പോഴും, ആത്മഹത്യയെ സെൻസേഷനലാക്കി മറ്റൊരു ആത്മഹത്യയ്ക്കുകാരണം ആയപ്പോഴും, അതിർത്തിയിൽ യുദ്ധം സ്വയം പ്രഖ്യാപിച്ചപ്പോഴും പലതവണ വിമർശിച്ചു നാക്കും കൈയ്യും കഴച്ചതാണെങ്കിലും പറയാതെ വയ്യാ - മലയാളം ടി.വി ചാനൽ പ്രവർത്തകരേ നിങ്ങൾ കുറേയേറെ പക്വത ആർജ്ജിക്കേണ്ടിയിരിക്കുന്നു.

24 മണിക്കൂർ ന്യൂസ് ഒരുക്കുവാൻ വേണ്ടി നെട്ടോട്ടമോടി, ഫോർത്ത് എസ്റ്റേറ്റിന്റെ സാമാന്യ മര്യാദകൾ മറന്ന്, ചർച്ചയും മറു ചർച്ചയുമായി എങ്ങനെ ചിന്തിക്കണം എന്ന് ജനങ്ങളെ “പ്രേരിപ്പിച്ചുകൊണ്ടുള്ള” ഈ പോക്ക് അത്ര നല്ലതിനല്ല. മത്സരബുദ്ധി നല്ലതാണ്, പക്ഷേ ഗുണപരവും സാംഗത്യമുള്ളതുമായ കാര്യങ്ങളുടെ പിന്നാലെ പോകുമ്പോൾ, ജനങ്ങൾക്കു വേണ്ടി സംസാരിക്കുമ്പോൾ. അല്ലാതെ ജനങ്ങളുടെ പ്രൈവസിയെ മാനിക്കാതെയും, എന്തുചവറും ഏറ്റവും ആദ്യം സ്ക്രീനിലെത്തിക്കാനുള്ള തത്രപ്പാടിൽപെട്ട് തീരെ അപക്വമായി പെരുമാറുകയും ചെയ്യാനാണു ഭാവമെങ്കിൽ ആ ശൈലി എന്നും വിജയകരമായി ഓടണമെന്നില്ല.

“ജ്വാലകൾ-ശലഭങ്ങൾ“ പുസ്തക പ്രകാശനം

2009-09-28T08:01:00.010+05:30

‘കൈതമുള്ള്’ എന്ന തൂലികാനാമത്തിൽ ബ്ലോഗിൽ കഥകളെഴുതുന്ന ശശി ചിറയിൽ എന്ന ശശിയേട്ടന്റെ പതിനഞ്ചു കഥകളുടെ സമാഹാരം ‘ജ്വാലകൾ-ശലഭങ്ങൾ’ എന്ന പേരിൽ ലിപി ബുക്സ് പുറത്തിറക്കുന്ന വിവരം ഇതിനു മുമ്പ് ഒരു പോസ്റ്റിൽ സൂചിപ്പിച്ചിരുന്നുവല്ലോ. ഈ പുസ്തകത്തിന്റെ പ്രകാശനകർമ്മം വരുന്ന ഒക്ടോബർ 6 ചൊവ്വാഴ്ച വൈകിട്ട് അഞ്ചുമണിക്ക് കോഴിക്കോട് ടൌൺഹാളിൽ വച്ച് ശ്രീ. സുകുമാർ അഴീക്കോട് നിർവ്വഹിക്കുന്നു. ആദ്യപ്രതി ഏറ്റുവാങ്ങുന്നത് സിസ്റ്റർ ജെസ്മിയാണ്.

ശ്രീ യു.എ. ഖാദർ അദ്ധ്യക്ഷതവഹിക്കുന്ന പ്രസ്തുത ചടങ്ങിൽ ഡോ. അസീസ് തരുവണ പുസ്തകത്തെ പരിചയപ്പെടുത്തുന്നു. പ്രസ്തുത ചടങ്ങിൽ സംബന്ധിക്കുവാൻ എല്ലാ വായനക്കാരെയും സ്നേഹപൂർവ്വം ക്ഷണിക്കുന്നു. ക്ഷണക്കത്ത് താഴെ നൽകുന്നു.

പുസ്തകപ്രകാശനത്തിനു ശേഷം കാറൽമണ്ണ നവകേരള കലാസമിതി അവതരിപ്പിക്കുന്ന ‘ബസ്തുകര’ എന്ന നാടകവും ഉണ്ടായിരിക്കുന്നതാണ്. പ്രശസ്ത സംഗീത സംവിധായകൻ ബാബുരാജിന്റെ ജീവിതകഥയെ ആസ്പദമാക്കിയാണ് ഈ നാടകം തയ്യാറാക്കിയിരിക്കുന്നത്.

കോഴിക്കോട് സഹൃദയവേദിയുടെ ക്ഷണക്കത്ത്:

KAITHAMULLU INVITAION

09-09-09 : ദുബായ് മെട്രോ ഭാവിയിലേക്ക് ....

2009-09-08T08:14:00.015+05:30

ദുബായ് നഗരത്തിന്റെ അനന്യസാധാരണവും ദൃതഗതിയിലുള്ളതുമായ വളർച്ചയിൽ മറ്റൊരു നാഴികക്കല്ല് നാട്ടിക്കൊണ്ട് ദുബായ് മെട്രോറെയിൽ നാളെ മുതൽ സർവ്വീസ് ആരംഭിക്കുന്നു. ദുബായ് ഭരണാധികാരി ഹിസ് ഹൈനസ് ഷെയ്ഖ് മുഹമ്മദ് റാഷിദ് അൽ മഖ്തൂം ആണ് ദുബായ് മെട്രോയുടെ ഔദ്യോഗിക ഉത്ഘാടനം നിർവ്വഹിക്കുന്നത്. ഇതോടുകൂടി മെട്രോട്രെയിൻ സർവ്വീസുള്ള ആദ്യ ഗൾഫ് നഗരമായിമാറുകയാണ് ദുബായ്. പ്ലാൻ ചെയ്യുന്ന പ്രോജക്റ്റുകൾ എല്ലാം സമയാനുസൃതമായി പൂർത്തിയാക്കിയ ചരിത്രമുള്ള ദുബായ് നഗരത്തിന് ഈ പ്രോജക്റ്റിലും പിഴവുസംഭവിച്ചില്ല. ഏകദേശം മൂന്നരവർഷം (മാർച്ച് 2006) മുമ്പ് റോഡ്സ് ആന്റ് ട്രാൻസ്പോർട്ട് അതോറിറ്റി ((RTA) ഈ സ്വപ്നപദ്ധതി ഔദ്യോഗികമായി പ്രഖ്യാപിക്കുമ്പോൾതന്ന അതിന്റെ ആദ്യഘട്ടത്തിന്റെ ഉത്ഘാടനത്തിനായി നിശ്ചയിച്ചിരുന്ന തീയതിയാണ് 2009 സെപ്റ്റംബർ 9 (09-09-09). ആ പ്രഖ്യാപനമാണ് നാളെ യാഥാർത്ഥ്യമാകുന്നത്.

Courtesy: Gulf News

ലോകത്തെ മറ്റു പലനഗരങ്ങൾക്കും സാദ്ധ്യമാവാത്ത ഒന്നാണ് ഈ രീതിയിലുള്ള വൻപദ്ധതികളുടെ സമയാനുബന്ധിതമായ പൂർത്തീകരണം എന്നുപറയുമ്പോൾ അതിൽ അതിശയോക്തി തീരെയില്ല. വെറും മൂന്നര വർഷംകൊണ്ടാണ് ഈ ബൃഹത്പദ്ധതി പൂർത്തിയായിരിക്കുന്നത്. 2800 കോടി ദിർഹം (ഏകദേശം 37000 കോടി രൂപ) ആണ് റെഡ്-ലൈനിന്റെ മാത്രം നിർമ്മാണച്ചെലവ്. ദുബായ് നഗരത്തിന്റെ ഭാവി വികസനങ്ങളുടെയും പബ്ലിക് ട്രാൻസ്പോർട്ടേഷൻ സൌകര്യങ്ങളുടെയും നട്ടെല്ലായാണ് മെട്രോ റെയിൽ വിഭാവനം ചെയ്തിരിക്കുന്നത്.

1990 കളുടെ ആദ്യം ദുബായ് നഗരത്തിന്റെ മുഖച്ഛായ ഇന്നുകാണുന്ന രീതിയിലായിരുന്നില്ല. റോഡു മാർഗ്ഗമുള്ള ഗതാഗതക്കുരുക്കുകൾ അന്ന് സാധാരണജനങ്ങൾക്ക് അനുഭവേദ്യവുമായിരുന്നില്ല. എന്നാൽ വളരെ ദീർഘവീക്ഷണമുണ്ടായിരുന്ന ഭരണാധികാരികൾ അന്നുതന്നെ നഗരത്തിന്റെ വളർച്ചയിൽ വർഷങ്ങൾക്കു ശേഷമുണ്ടാവാൻ പോകുന്ന വികസനവും, റോഡുഗതാഗതത്തിൽ വരാൻ പോകുന്ന ഭീമമായ വർദ്ധനയും, അതോടൊപ്പം ആ‍വശ്യമായി വരുന്ന അടിസ്ഥാനസൌകര്യങ്ങളുടെ വികസനങ്ങളും മനസ്സിൽകണ്ടിരുന്നു. 1997 ൽ നടത്തിയ ഒരു പഠനത്തിൽ ഉരുത്തിരിഞ്ഞുവന്ന ആശയമാണ് മെട്രോ റെയിൽ പദ്ധതി. തൊണ്ണൂറുകളുടെ തുടക്കത്തിലെ ദുബായിയും ഇന്നത്തെ ദുബായിയും തമ്മിലുള്ള വ്യത്യാസം ഈ ഫോട്ടോയിൽ കാണാം! ദീർഘവീക്ഷണം എന്നാലെന്താണ് എന്നതിന്റെ ഏറ്റവും നല്ല ഒരു ഉദാഹരണം. 2003 ആയപ്പോഴേക്കും പ്രതീക്ഷിച്ചിരുന്നതുപോലെ വാഹനങ്ങളുടെ എണ്ണത്തിൽ വൻ‌വർദ്ധനവുണ്ടായി. 2005 ലാണ് റോഡ്സ് ആന്റ് ട്രാൻസ്പോർട്ട് അതോറിറ്റി (RTA) നിലവിൽ വന്നത്. തൊട്ടടുത്തവർഷം തന്നെ ദുബായ് മെട്രോ പദ്ധതി ഔദ്യോഗികമായി പ്രഖ്യാപിക്കുകയും ചെയ്തു. 2006 മാർച്ച് 21 ന് ദുബായ് മെട്രോയുടെ ആദ്യഘട്ട നിർമ്മാണപ്രവർത്തനങ്ങൾ ആരംഭിച്ചു.

Red-line, Green-line and Purple-line എന്നിങ്ങനെ നാമകരണം ചെയ്തിരിക്കുന്ന മുന്നു വ്യത്യസ്ത പാതകളുൾക്കൊള്ളുന്ന ദുബായ് മെട്രോ പദ്ധതിയിലെ 52.1 കിലോമീറ്റർ നീളം വരുന്ന ചുവപ്പു പാതയാണ് നാളെ പ്രവർത്തനം ആരംഭിക്കുന്നത്. ഗ്രീൻലൈൻ അടുത്തവർഷം മധ്യത്തോടെ പണി പൂർത്തീകരിക്കത്തക്കവിധം നിർമ്മാണപ്രവർത്തനങ്ങൾ പുരോഗമിക്കുന്നു. ദുബായ് ഇന്റർനാഷനൽ എയർപോർട്ടിനടുത്തുള്ള റഷീദിയ സ്റ്റേഷൻ മുതൽ ജബൽ അലി ഫ്രീസോൺ വരെ നീളുന്ന ചുവന്ന പാത ഈ പാത ദുബായിയിലെ പ്രധാന ഹൈവേ ആയ ഷേയ്ഖ് സായിദ് റോഡിനു സമാന്തരമായാണ് അതിന്റെ ഭൂരിഭാഗം വരുന്ന ഭാഗങ്ങളിലും കടന്നുപോകുന്നത്.

ദേര, ബർദുബായ് നഗരങ്ങളുടെ ഹൃദയഭാഗങ്ങൾ വഴികടന്നുപോകുന്ന ഏകദേശം അഞ്ചുകിലോമീറ്ററോളം വരുന്ന ഭാഗം പൂർണ്ണമായും ഭൂഗർഭതുരങ്കങ്ങൾ വഴിയാണ് നിർമ്മിച്ചിരിക്കുന്നത്. ഈ ഭാഗങ്ങളിലുള്ള സ്റ്റേഷനുകളും ഭൂമിക്കടിയിൽ തന്നെ. ബാ‍ക്കിയുള്ള മുഴുവൻ ഭാഗങ്ങളും ഒറ്റത്തൂണുകളിൽ ഉറപ്പിച്ചിരിക്കുന്ന വയഡക്റ്റ് ബ്രിഡ്ജ് വഴിയും കടന്നുപോകുന്നു. ഈ ഭാഗങ്ങളിലുള്ള സ്റ്റേഷനുകളെല്ലാംതന്നെ ഭൂനിരപ്പിൽ നിന്നും ഉയർന്ന നിരപ്പിലാണുള്ളത്. സ്റ്റേഷനുകളോടു ബന്ധിപ്പിച്ച് ഹൈവേയുടെ മറുവശത്തേക്ക് യാത്രക്കാർക്ക് എത്തുവാനുള്ള എയർകണ്ടീഷൻഡ് ഫുട്-ബ്രിഡ്ജുകളും ഉണ്ട്.

മെട്രോയുടെ രൂപരേഖ Courtesy: Wikipedia

ഒട്ടനവധി പ്രത്യേകതകളുള്ളതാണ് ദുബായ് മെട്രോ. ട്രെയിനുകളും റെയിൽ നെറ്റ്വർക്കും പൂർണ്ണമായും ഓട്ടോമേറ്റഡ് ആണ്. ഡ്രൈവർ ഇല്ലാതെ ഓടുന്ന ട്രെയിനുകൾ കമ്പ്യൂട്ടർ നിയന്ത്രിതമാണ്. ഈ രീതിയിലുള്ള ലോകത്തിലെ രണ്ടാമത്തെ മെട്രോയാണ് ദുബായ് മെട്രോ. പൂർണ്ണമായും എയർകണ്ടീഷൻ ചെയ്തവയാണ് സ്റ്റേഷനുകളും ട്രെയിനുകളും. ഇരുവശത്തേക്കും കടന്നുപോകുന്ന ഡബിൾ ലൈനുകളിലായി 44 ട്രെയിനുകളാണ് നാളെമുതൽ റെഡ് ലൈനിൽ സർവ്വീസ് നടത്തുക. ക്രമേണ ഇത് 62 ആയി വർദ്ധിപ്പിക്കും. രാവിലെ 5 മണിമുതൽ രാത്രി 12:30 വരെ ട്രെയിനുകൾ സർവ്വീസ് നടത്തും. അഞ്ചു കമ്പാർട്ട്മെന്റുകൾ വീതമാണ് ഓരോ ട്രെയിനിലും ഉള്ളത്. സ്ത്രീകൾക്കും കുട്ടികൾക്കുമായി മാത്രം റിസർവ് ചെയ്തിരിക്കുന്ന ഒരു കമ്പാർട്ട്മെന്റും നാലു ജനറൽ കമ്പാർട്ട്മെന്റുകളുമാണ് ഓരോ ട്രെയിനിലും ഉണ്ടാവുക.

സ്റ്റേഷനുകളും അത്യന്താധുനികമാണ്. അവയുടെ രൂപം മുത്തുച്ചിപ്പിയെ ഓർമ്മിപ്പിക്കുന്നു. എല്ലാ ആധുനിക സൌകര്യങ്ങളും കൂട്ടിയിണക്കിയിരിക്കുന്ന ഈ സ്റ്റേഷനുകൾ യാത്രക്കാരുടെ സുരക്ഷയ്ക്ക് മുൻ‌തൂക്കം നൽകുന്നു. സ്റ്റേഷനുകളിലും ട്രെയിനുകളിലും വൈഫൈ ഇന്റർനെറ്റ് കണക്ഷൻ സൌജന്യമാണ്. സ്റ്റേഷനുകളുടെയും, ട്രെയിനുകളുടെയും, റെയിൽ‌വേ ലൈനിന്റെ നിർമ്മാണത്തിലും ദുബായിയുടെ പ്രത്യേകതയായ ‘ഫിനിഷിംഗ് ടച്ച്’ കാണാവുന്നതാണ്. യാതൊരു പിശുക്കും കാണിക്കാതെ, ഏറ്റവും മനോഹരമായ ഫിനിഷിംഗ് മെട്രോയുടെ എല്ലാ ഭാഗങ്ങളിലും നൽകിയിരിക്കുന്നു - റെയിൽ കടന്നുപോകുന്ന ബ്രിഡ്ജുകളുടെ പെയിന്റിംഗ് ഉൾപ്പടെയുള്ള കാര്യങ്ങളിൽ.

ഒരു സ്റ്റേഷന്റെ ഉൾഭാഗം Courtesy: Gulf News

ബുക്ക് സ്റ്റോറുകൾ, കോഫി ഷോപ്പുകൾ, മറ്റ് ഔട്ട്ലറ്റുകൾ തുടങ്ങി യാത്രക്കാർക്ക് അത്യാവശ്യം വേണ്ട എല്ലാ സൌകര്യങ്ങളും സ്റ്റേഷനുകളിൽ ഒരുക്കിയിരിക്കുന്നു. റെഡ് ലൈനിൽ 29 സ്റ്റേഷനുകളാണുള്ളത്. ഇതിൽ പത്തെണ്ണം നാളെ പ്രവർത്തനം ആരംഭിക്കുന്നു. സ്റ്റേഷനുകളിലേക്ക് യാത്രക്കാരെ എത്തിക്കുവാനായി ട്രെയിനുകളോപ്പം തന്നെ ഫീഡർ ബസ് സർവ്വിസുകളും RTA ആരംഭിച്ചിട്ടുണ്ട്. അത്യന്താധുനികങ്ങളായ 700 ഫീഡർബസുകളാണ് നാളെമുതൽ നിരത്തിലിറങ്ങുന്നത്. ഫീഡർ ബസുകളിലും ട്രെയിനുകളിലും ഒരേ ടിക്കറ്റിൽ യാത്രചെയ്യാം എന്നതാണ് പ്രത്യേകത. ഫീഡർ ബസുകളിലും ട്രെയിനുകളിലും വികലാംഗർക്ക് വീൽച്ചെയർ ഉൾപ്പടെ കയറാനുള്ള സംവിധാനവും ഉണ്ട്.

ട്രെയിനുകളും പ്രത്യേകതകളുള്ളവതന്നെ. കമ്പാർട്ട്മെന്റുകളുടെ ഉള്ളിൽ ട്രെയിൻ ഓടുന്നതിന്റെ ശബ്ദമോ, റെയിൽ‌വേട്രാക്കിന്റെ പരിസരങ്ങളിൽ ട്രെയിൻ ഓടുന്നതിന്റെ വിറയലോ ഇല്ല. നിശ്ശബ്ദട്രെയിനുകൾ എന്നുതന്നെ പറയാം. ആധുനിക വാർത്താവിനിമയ സൌകര്യങ്ങളും, സേഫ്റ്റി സംവിധാനങ്ങളും ട്രെയിനുകളിൽ ഉണ്ട്. മണിക്കൂറിൽ 110 കിലോമീറ്റർ വരെ വേഗത്തിൽ ഓടാൻ സാധിക്കുന്നവയാണ് ഈ ജപ്പാൻ നിർമ്മിത ട്രെയിനുകൾ. പക്ഷേ ദുബായ് മെട്രോയിൽ ഇത്രയധികം സ്പീഡിൽ ഇവ ഓടുന്നില്ല - അടുത്തടുത്ത് സ്റ്റേഷനുകൾ ഉള്ളതിനാൽ. റെഡ് ലൈനിലെ 51 കിലോമീറ്റർ ദൂരം 60 മുതൽ 63 വരെ മിനുറ്റുകൾ കൊണ്ട് ഓടിയെത്താൻ പാകത്തിലാവും ട്രെയിനുകളുടെ വേഗതക്രമീകരിക്കുന്നത്.

ഒരു സ്റ്റേഷന്‍, ഹൈവേയ്ക്ക് കുറുകേ യാത്രക്കാര്‍ക്ക് കടക്കുവാനുള്ള ഫുട്‌ബ്രിഡ്ജ് എന്നിവ

ദുബായിയിലെ പ്രധാന റെസിഡൻഷ്യൽ ഏരിയകളേയും, ഷോപ്പിംഗ് സെന്ററുകളേയും, ബിസിനസ് സെന്ററുകളേയും, വിനോദസഞ്ചാരകേന്ദ്രങ്ങളേയും, എയർപോർട്ട്, ബസ്, വാട്ടർട്രാൻസ്പോട്ട് സർവ്വീസ് സ്റ്റേഷനുകളേയും ബന്ധിപ്പിച്ചുകൊണ്ടാണ് മെട്രോ കടന്നുപോകുന്നത്. അതുകൊണ്ടുതന്നെ നിലവിൽ ദുബായ് നിരത്തുകളിൽ അനുഭവപ്പെടുന്ന ട്രാഫിക് പ്രശ്നങ്ങൾക്ക് വലിയൊരളവു വരെ പരിഹാരം മെട്രോയുടെ വരവോടെ ഉണ്ടാകും എന്ന് പ്രതീക്ഷിക്കപ്പെടുന്നു.

യാത്രക്കാർക്ക് വലിയ ഭാരമാകാത്ത രീതിയിലാണ് മെട്രോയുടെ ടിക്കറ്റ് നിരക്കുകൾ നിലവിൽ അവതരിപ്പിച്ചിരിക്കുന്നത്. Nol കാർഡുകൾ എന്നറിയപ്പെടുന്ന ഇലക്ട്രോണിക് പ്രീപെയ്ഡ് കാർഡുകൾ ഉപയോഗിച്ചാണ് ടിക്കറ്റുകൾ എടുക്കേണ്ടത്. മെട്രോയെ മൂന്നു സോണുകളായി തിരിച്ചിരിക്കുന്നു. ഓരോ സോണിനും അനുസരിച്ചാണ് ടിക്കറ്റ് നിരക്കുകൾ. ഏറ്റവും കുറഞ്ഞ നിരക്ക് 1.8 ദിർഹം ആണ്. ഇതുകൂടാതെ ഇതേ നോൾ കാർഡുകൾ ദുബായിയിലെ ബസ്-ബോട്ട്-മെട്രോ ടിക്കറ്റുകൾക്കായി ഉപയോഗിക്കാം എന്ന സൌകര്യവുമുണ്ട്. അതുകൊണ്ട് ഒരു ദിവസത്തെ പരമാവധി ടിക്കറ്റ് 14 ദിർഹം എന്ന് നിജപ്പെടുത്തിയിരിക്കുന്നു. അതായത് 14 ദിർഹം ടിക്കറ്റ് ഉപയോഗിച്ച് ഒരു ദിവസം മുഴുവൻ RTA യുടെ സിറ്റി ട്രാൻസ്പോർട്ട് സൌകര്യങ്ങൾ (മെട്രോയിലെ ഗോൾഡ് ക്ലാസ് ഒഴികെ) ഉപയോഗിക്കാം. പ്രധാന സ്റ്റേഷനുകളോടൊപ്പം വലിയ ബഹുനില കാർപാർക്കിംഗ് സൌകര്യങ്ങളും RTA ഒരുക്കിയിരിക്കുന്നു. മെട്രോയാത്രക്കാർക്ക് സൌജന്യമാണ് പാർക്കിംഗ്.

Water, Air, Fire എന്നീ തീമുകളെ അടിസ്ഥാനമാക്കിയാണ് മെട്രോ സ്റ്റേഷനുകളുടെ ഇന്റീരിയർ ഡിസൈനിംഗ് ചെയ്തിരിക്കുന്നത്. ഈ ഓരോ തീമിനും ചേരുന്ന രീതിയിലുള്ള വർണ്ണങ്ങൾ, ടെക്സ്ചറുകൾ, മറ്റു ഡെക്കറേഷനുകൾ എല്ലാം ഓരോ സ്റ്റേഷനും സ്വന്തം! ഗ്രീൻ ലൈനിൽ ദുബായ് നഗരത്തിന്റെ സ്വന്തമായ അറബ് വാസ്തുശില്പകലാ പാരമ്പര്യം അതേപടി പുനർനിർമ്മിച്ചിരിക്കുന്ന സ്റ്റേഷനുകളും ഉണ്ട്. റെയിൽ‌വേ സ്റ്റേഷനുകളുടെ പേരുകൾ RTA ലേലം വഴി കോർപ്പറേറ്റ് കമ്പനികൾക്ക് നൽകിയിരുന്നു. യു.എ.ഇ യിലെ കോർപ്പറേറ്റ് കമ്പനികളുടെ പേരുകളിലാണ് സ്റ്റേഷനുകൾ അറിയപ്പെടുക. എമിറേറ്റ്സ് എയർലൈൻസ്, എത്തിഹാദ്, ബുർജ് അൽ അറബ് തുടങ്ങിയ വമ്പന്മാരുടെയെല്ലാം പേരിൽ സ്റ്റേഷനുകൾ ഉണ്ട്.

ട്രാക്കിലേക്ക് തുറക്കുന്ന കക്കൂസുകളില്ലാത്ത ഈ മെട്രോ ട്രെയിനുകളും അതുമായി ബന്ധപ്പെട്ട ശൃഖലയും ഏതെങ്കിലും രീതിയിൽ വൃത്തികേടാക്കുന്നവരെ കാത്തിരിക്കുന്നത് വൻ പിഴകളാണ്! മുറുക്കിത്തുപ്പുക, അലക്ഷ്യമായി പേപ്പറുകളും മറ്റും വലിച്ചെറിയുക, ട്രെയിനിന്റെ ഉള്ളിൽ കുത്തിവരയ്ക്കുക്ക, കോറിയിടുക, സീറ്റിൽ കാലുകയിറ്റി വയ്ക്കുക തുടങ്ങി യാത്രക്കാർ കാണിക്കാൻ സാധ്യതയുള്ള എല്ലാ ‘വൃത്തികേടുകളും’ അവയ്ക്കോരോന്നിനുമുള്ള പിഴസംഖ്യയും ഇപ്പോഴേ പ്രസിദ്ധപ്പെടുത്തിയിട്ടുണ്ട്. ട്രെയിനിന്റെ ഉള്ളിൽ ഭക്ഷണവും പുകവലിയും പാടില്ല. ഓരോ കം‌പാർട്ട്മെന്റിലും സർവൈലൻസ് ക്യാമറകളും ഇൻസ്പെക്റ്റർ മാരും ഉണ്ടത്രേ. നിയമങ്ങൾ ഉണ്ടാക്കാൻ മാത്രമല്ല, അത് ഭംഗിയായി നടപ്പാക്കാനും അറിയാവുന്ന ഈ രാജ്യത്ത് മെട്രോ ട്രെയിൻ വർഷങ്ങൾക്കു ശേഷവും വൃത്തിയായിതന്നെയിരിക്കും എന്ന കാര്യത്തിൽ സംശയം വേണ്ട!

2020 ആകുമ്പോഴേക്കും ദുബായ് മെട്രോ ലോകത്തെ ഏറ്റവും വലിയ മെട്രോ റെയിൽ ശൃഖല ആയിമാറും എന്നാണ് കണക്കാക്കുന്നത്. അപ്പോഴേക്കും ഈ റെയിൽ ശൃഖലയ്ക്ക് 318 കിലോമീറ്റർ നീളം പ്ലാൻ ചെയ്യുന്നു. ഒരു ദിവസം പന്ത്രണ്ടുലക്ഷം യാത്രക്കാർക്ക് സൌകര്യങ്ങളൊരുക്കുക എന്ന ലക്ഷ്യമാണ് RTA വിഭാവനം ചെയ്യുന്നത്.

My Metro, My City: മെട്രോ പ്രവർത്തനം ആരംഭിക്കുന്നതിനു ഏകദേശം ഒരു വർഷം മുമ്പ് തന്നെ സിറ്റിയിലെ ജനങ്ങൾക്ക് മെട്രോയുമായി ഒരു ആത്മബന്ധം സ്ഥാപിക്കുന്നതിനുദ്ദേശിച്ച് RTA ആരംഭിച്ച കാമ്പെയിൻ ആണ് ‘മൈ മെട്രോ മൈ സിറ്റി‘ എന്നത്. പരസ്യപ്രചരണങ്ങൾ, മാധ്യമങ്ങളിൽക്കൂടിയുള്ള അവബോധമുണ്ടാക്കൽ തുടങ്ങി ഒട്ടനവധി കാര്യങ്ങൾ ഈ പ്രോജക്റ്റിൽ ഉണ്ടായിരുന്നു. പുതിയ ഒരു mode of transport ജനങ്ങൾ നെഞ്ചിലേറ്റുവാൻ വളരെ ഫലപ്രദമായ ഒരു കാമ്പെയിൻ ആയിരുന്നു എന്നത് സംശയമില്ലാത്ത കാര്യമാണ്.

സിവിൽ എഞ്ചിനീയറിംഗ് രംഗത്തെ ഏറ്റവും ആധുനിക സാങ്കേതികവിദ്യകളാണ് മെട്രോയുടെ നിർമ്മാണത്തിനായി ഉപയോഗപ്പെടുത്തിയത്. റെഡ് ലൈനിലെ 51.1 കിലോമീറ്റർ നീളത്തിൽ 44.1 കിലോമീറ്റർ നീളവും മെട്രോ റെയിൽ മേൽ‌പ്പാലങ്ങൾ വഴിയാണ് കടന്നുപോകുന്നതെന്ന് പറഞ്ഞുവല്ലോ. 4.7 കിലോമീറ്റർ ദൂരം ഭൂഗർഭ തുരങ്കം വഴിയും 3.3 കിലോമീറ്റർ ദൂരം ഗ്രൌണ്ട് ലെവലിലും പാത കടന്നുപോകുന്നു. ഇനി വരാനുള്ള റെയിൽ ലൈനുകളും ഈ രീതിയിൽ മേൽ‌പ്പാലങ്ങളിലൂടെയാണു കടന്നുപോകുന്നത്. ഏറെക്കുറെ ഒരേ ലെവലിൽ പോകുന്ന ഈ പാലം, നിലവിലുള്ള റോഡ് ഫ്ലൈഓവറുകൾക്ക് മുകളിലേക്ക് നന്നായി ഉയർന്നും, ചില സ്ഥലങ്ങളിൽ ഫ്ലൈഓവറുകളുടെ അടിയിലേക് താണും, വലിയ ഇന്റർചെയ്ഞ്ചുകളുടെ വശങ്ങളിലേക്ക് വളഞ്ഞും കടന്നുപോകുന്ന കാഴ്ച അത്ഭുതകരം തന്നെ.

മേൽ‌പ്പാലങ്ങളൊന്നും തന്നെ അവ നിൽക്കുന്ന ഭാഗങ്ങളിൽ വച്ച് പരമ്പരാഗത രീതിയിൽ തട്ടടിച്ച് വാർത്ത് എടുത്തവയല്ല. രണ്ടു പില്ലറുകൾക്ക് ഇടയിലുള്ള പാലത്തിന്റെ ഭാഗത്തെ വയഡക്റ്റുകൾ (viaducts) എന്നുവിളിക്കുന്നു. ഓരോ വയഡക്റ്റ് സ്പാനും ‘ചെറിയ കഷണങ്ങൾ’ (പ്രീകാസ്റ്റ് രീതിയിൽ) ചേർത്തുണ്ടാക്കിയവയാണ്. ഈ കഷണങ്ങളെ മെട്രോ യാർഡിൽ വച്ച് വാർത്തുണ്ടാക്കിയതിനു ശേഷം അവയെ വലിയ ട്രെയിലറുകളിൽ, സൈറ്റിൽ എത്തിക്കുകയായിരുന്നു. അതിനുശേഷം, ഒരു മാലയിലെ മുത്തുമണികൾ പോലെ viaduct segments കോർത്തിണക്കിയാണ് ഉണ്ടാക്കിയെടുത്തത്. ഓരോ viaduct പീസുകളുടെയും വലിപ്പം കേള്‍ക്കണോ? പത്തുമീറ്റർ വീതി, നാലുമീറ്റർ നീളം ! പില്ലറുകളും പ്രീകാസ്റ്റ് രീതിയില്‍ ഉണ്ടാക്കിയവ തന്നെ. ഈരണ്ടു പില്ലറുകൾക്ക് ഇടയിൽ കുറഞ്ഞത് മുപ്പതുമീറ്റർ അകലമുണ്ട്. അതിൽ ഇതുപോലെയുള്ള എട്ടു viaduct segments ഉം ഉണ്ട്. പ്രത്യേകതരം ഉപകരണങ്ങള്‍ ഉപയോഗിച്ചായിരുന്നു ഈ ഭാരിച്ച ഭാഗങ്ങള്‍ കൂട്ടിയോജിപ്പിച്ചത്. ഈ രീതിയിലുള്ള നിര്‍മ്മാണവിദ്യകള്‍ കൊണ്ടാണ് ഇത്രവേഗം ഈ പണികള്‍ പൂര്‍ത്തീകരിക്കാനായത്. പാലങ്ങളുടെ നിർമ്മാണത്തിലെ വിവിധഘട്ടങ്ങൾ താഴെക്കാണാം.

തിരക്കേറിയ നഗരത്തിനുള്ളിൽക്കൂടി ഭുഗർഭ തുരങ്കം നിർമ്മിക്കുന്ന ജോലിയും എഞ്ചിനീയറിംഗ് വെല്ലുവിളി തന്നെയായിരുന്നു. അതിന്റെ ഒരു ഭാഗം ദുബായ് ക്രീക്ക് എന്ന ജലപാതയുടെ അടിയിലൂടെയും കടന്നുപോകുന്നു. റോഡുഗതാ‍ഗതത്തിൽ അത്രയധികം ബുദ്ധിമുട്ടുകളൊന്നും വരുത്താതെയായിരുന്നു ഈ ജോലികൾ പൂർത്തിയാക്കിയത്. ജാപ്പനീസ് കമ്പനികളായ മിത്സുബിഷി കോര്‍പ്പറേഷന്‍, മിത്‌സുബിഷി ഹെവി ഇന്‍ഡസ്ട്രീസ്, ഒബായാഷി കോര്‍പ്പറേഷന്‍, കാജിമ കോര്‍പ്പറേഷന്‍ എന്നിവയും ടർക്കി കമ്പനിയായ Yapi Merkezi തുടങ്ങിയവ ഉൾപ്പെടുന്ന ദുബൈ റാപിഡ് ലിങ്ക് (DURL) കൺസോര്‍ഷ്യം ആണ് മെട്രോയുടെ നിർമ്മാണം പൂർത്തിയാക്കിയത്. മെട്രോ നിർമ്മാണത്തിനിടയിലെ ചില ചിത്രങ്ങൾ ഇവിടെയും ഇവിടെയും കാണാം. ബ്രിട്ടീഷ് കമ്പനിയായ സെർകോ (Serco) ആണു മെട്രോയുടെ ഓപ്പറേഷൻസ് കൈകാര്യം ചെയ്യുന്നത്.

നാഴികക്കല്ലുകൾ:

1997 : സാധ്യതാപഠന റിപ്പോർട്ട് മെട്രോ പദ്ധതി വിഭാവനം ചെയ്തു
ജൂലൈ 2005 : DURAL മെട്രോയുടെ ഡിസൈൻ / നിർമ്മാണ കോൺ‌ട്രാക്റ്റ് നേടി
മാർച്ച് 2006 : റെഡ് - ഗ്രീൻ ലൈനുകളുടെ നിർമ്മാണം ആരംഭിച്ചു
ഏപ്രിൽ 2008: ആദ്യ ട്രെയിൻ ട്രാക്കിൽ
മെയ് 2008: ആദ്യ റെയിൽ ഡെമോൺസ്ട്രേഷൻ
സെപ്റ്റംബർ 2008: ആദ്യ ട്രയൽ റൺ
ഓഗസ്റ്റ് 2009 : ആദ്യപത്ത് സ്റ്റേഷനുകൾ പ്രഖ്യാപിച്ചു
സെപ്റ്റംബർ 9, 2009: ദുബായ് മെട്രോ, പ്രഖ്യാപനം അനുസരിച്ച് പ്രവർത്തനം ആരംഭിക്കുന്നു.

ദുബായ് നഗരികണ്ടതിൽ വച്ച് ഏറ്റവും അഭിമാനാര്‍ഹമായ പ്രോജക്റ്റുകളില്‍ ഒന്നാണ് ദുബായ് മെട്രോ എന്നതില്‍ സംശയമില്ല. ഈ അവസരത്തിൽ ഇതിന്റെ പിന്നിൽ അധ്വാനിച്ച ആയിരക്കണക്കിനാളുകളെ അഭിനന്ദിക്കാം. ഈ പ്രോജക്റ്റ് യാഥാർഥ്യമാക്കുവാൻ ദീർഘവീക്ഷണത്തോടെ പ്രവർത്തിച്ച ഭരണാധികാരികൾ, RTA, വിവിധ രാജ്യക്കാരായ അഞ്ഞൂറിലേറെ എഞ്ചിനീയർമാർ, ഇന്ത്യക്കാരുൾപ്പടെയുള്ള പതിനായിരത്തിനടുത്ത് ലേബർമാർ, മറ്റനവധി ടെക്നിക്കൽ വിദഗ്ദ്ധർ തുടങ്ങി കൂട്ടായ മനുഷ്യപ്രയത്നത്തിന്റെ വിജയമാണ് വെറും മൂന്നര വർഷംകൊണ്ട് ഇത്തരത്തിലൊരു ഭീമൻ പ്രോജക്റ്റ് യാഥാർത്ഥ്യമാകുമ്പോൾ നാം കാണുന്നത്. അവരുടെ അധ്വാനത്തിനത്തിനുമുന്നിൽ ഹൃദയപൂർവ്വം ആശംസകൾ നേരുന്നു !

ദുബായ് മെട്രോയിൽ ഒരു യാത്ര

ഇന്ത്യന്‍ എക്സ്പ്രസില്‍ ‘ജ്വാലകള്‍’

2009-08-26T22:07:00.004+05:30

ബൂലോകത്തെ പ്രമുഖ കഥാകൃത്തുക്കളില്‍ ഒരാളായ “കൈതമുള്ള്” ബ്ലോഗുടമ ശ്രീ. ശശി ചിറയില്‍ എന്ന ശശിയേട്ടന്റെ ‘ജ്വാലകള്‍’ എന്ന കഥാസമാഹരത്തെപ്പറ്റിയാണ് ഇന്ത്യന്‍ എക്സ്പ്രസിന്റെ ഈ ആഴ്ചയിലെ ‘Express Buzz' ല്‍ ആഷാ പി. നായര്‍ തന്റെ ബ്ലോഗ് സ്പോട്ട് എന്ന കോളത്തില്‍ എഴുതിയിരിക്കുന്നത്. ശശിയേട്ടന്റെ ബ്ലോഗിലൂടെ പ്രസിദ്ധീകരിക്കപ്പെട്ട പതിനഞ്ചു കഥകളുടെ സമാഹാരമാണ് അടുത്ത മാസം ലിപി ബുക്സ് പ്രസിദ്ധീകരിക്കുവാനൊരുങ്ങുന്ന ‘ജ്വാലകള്‍ ശലഭങ്ങള്‍’ എന്ന പുസ്തകത്തിലുള്ളത്. മുപ്പത്തഞ്ചു വര്‍ഷക്കാലത്തെ തന്റെ വിദേശവാസത്തിനിടയില്‍ ശശിയേട്ടൻ പരിചയപ്പെട്ട പതിനഞ്ചു വ്യത്യസ്ത സ്ത്രീകഥാപാത്രങ്ങളെ കേന്ദ്രീകരിച്ചാണ് ഇതിലെ ഓരോ കഥയും നമ്മുടെ മുമ്പില്‍ ഇതള്‍ വിരിക്കുന്നത്.

ബ്ലോഗില്‍ പ്രസിദ്ധീകരിച്ചിരുന്ന അവസരത്തില്‍ വളരെയേറെ ശ്രദ്ധിക്കപ്പെട്ട ഒന്നായിരുന്നു ജ്വാലാ സീരീസിലെ പതിനഞ്ചു കഥകളും. ശശിയേട്ടന്റെ വളരെ ലാഘവത്തോടെയുള്ള രചനാശൈലിയും, ഭാഷയിലെ ലാളിത്യവും, അനുഭവകഥകള്‍ എന്ന പ്രത്യേകതയും, വായനക്കാരെ പിടിച്ചു നിര്‍ത്തുവാന്‍ പോന്ന ചേരുവകകളും ഒത്തുചേര്‍ന്നപ്പോള്‍ ജ്വാലാകൾ ബ്ലോഗില്‍ ഒരു പുതുമയായി.

അനുഭവങ്ങളുടെ പിന്‍‌ബലത്തില്‍ പറഞ്ഞിരിക്കുന്ന ഇതിലെ ഓരോ കഥയും വ്യത്യസ്തമായ ജീവിതാനുഭവങ്ങളിള്‍ക്കൂടി കടന്നു പോകുന്ന സ്ത്രീ മനസ്സുകളുടെ പരിച്ഛേദമാണ്. അതോടൊപ്പം നാട്ടിൽ നിന്നകന്ന്, മുപ്പത്തഞ്ചുവര്‍ഷക്കാലം വിദേശത്ത് കഴിഞ്ഞ ഒരു പ്രവാസിയുടെ ജീവിത പരിചയവും ഒത്തു ചേരുമ്പോള്‍ നല്ലൊരു വായനാനുഭവം പങ്കുവയ്ക്കുന്നു ഈ കഥകള്‍.

സമകാലീന മലയാള സാഹിത്യത്തില്‍ ശ്രദ്ധേയമായിത്തീരുവാന്‍ ഈ പുസ്തകത്തിനാവും എന്നുതന്നെയാണ് എന്റെ വിശ്വാസം. ഈ അവസരത്തിൽ ശശിയേട്ടന് എല്ലാവിധ ആശംസകളും നേരുന്നു.

ചെറായി ഹ..ഹ..ഹ - ഒരറിയിപ്പ്

2009-07-30T16:50:00.013+05:30

ഇക്കഴിഞ്ഞ ചെറായിമീറ്റിന്റെ ഒരുക്കങ്ങള്‍ നടക്കുന്നതിനിടെ, മീറ്റ് ദിവസം എല്ലാവര്‍ക്കും ഇഷ്ടമാവുന്ന എന്തൊക്കെ പരിപാടികള്‍ ആവാം എന്ന് ആലോചിക്കുന്ന അവസരത്തില്‍ എന്റെ മനസ്സില്‍ വന്ന ഒരു ആശയമായിരുന്നു കാര്‍ട്ടൂണിസ്റ്റ് സജ്ജീവേട്ടന്റെ വക ഒരു കാരിക്കേച്ചര്‍ സ്കെച്ച് ഡെമോ എന്നത്. മറ്റൊരു പരിപാടിയായിരുന്ന ജി.മനുവിന്റെ കുസൃതിച്ചോദ്യങ്ങള്‍ അന്നേ ദിവസം സമയക്കുറവുകാരണം നടത്താന്‍ സാധിച്ചില്ല. എല്ലാവര്‍ക്കും ഇഷ്ടമാവുന്ന രാഷ്ട്രീയക്കാരുടെയോ സിനിമാതാരങ്ങളുടെയോ കുറച്ചു ചിത്രങ്ങള്‍ സജ്ജീവേട്ടന്‍ വരയ്ക്കുക എന്നതാണപ്പോള്‍ എന്റെ മനസ്സിലുണ്ടായിരുന്നത്. അതേ തുടര്‍ന്ന് അദ്ദേഹത്തിന് അന്നേദിവസം അവിടെ എത്തുവാന്‍ സമ്മതമാവുമോ എന്നറിയുവാനായി ഒരു ചെറിയ കത്ത് ഞാന്‍ അയച്ചു. അതില്‍ ഈ ആഗ്രഹവും പറഞ്ഞിരുന്നു.

അഞ്ചുമിനിറ്റിനുള്ളില്‍ മറുപടിയെത്തി. ഞാന്‍ പ്രതീക്ഷിച്ചതിലും കുറേപ്പടികള്‍ മുമ്പോട്ട് കടന്ന് നില്‍ക്കുന്ന ഒരു മറുപടിയായിരുന്നു അത്. വെറും കാരിക്കേച്ചര്‍ ഡെമോ മാത്രം ആക്കുന്നതെന്തിന്, അവിടെ വരുന്ന എല്ലാവരുടെയും ചിത്രം വരയ്ക്കാമല്ലോ എന്നായിരുന്നു അദ്ദേഹത്തിന്റെ മറുപടി. അങ്ങനെയെങ്കില്‍ അതിനായി വേണ്ട സാധനങ്ങളുടെ ഒരു ലിസ്റ്റ് പറയാമോ എന്നു ചോദിച്ചുകൊണ്ട് ഒരു മറുപടി അങ്ങോട്ട് ഉടനെ വിട്ടു. കുറേ ഫെല്‍റ്റ് ടിപ് മാര്‍ക്കറുകള്‍, 300 ഗ്രാം Denisty ഉള്ള നൂറ് A4 സൈസ് പേപ്പറുകള്‍, പത്ത് ചാര്‍ട്ട് പേപ്പറുകള്‍, ഒരു ബോര്‍ഡ്, അതില്‍ പേപ്പര്‍ ഉറപ്പിക്കാനുള്ള പിന്നുകള്‍ ഇത്രയും സാധനങ്ങളായിരുന്നു അദ്ദേഹം ആവശ്യപ്പെട്ടത്. അതില്‍ ചാര്‍ട്ട് പേപ്പര്‍ ഒഴികെയുള്ള സാധനങ്ങള്‍ വെക്കേഷന്‍ ഷോപ്പിങ്ങിനിടെ ഷാര്‍ജയില്‍നിന്ന് ഞാന്‍ വാങ്ങി. ചാര്‍ട്ട് പേപ്പര്‍ വാങ്ങുവാന്‍ നാട്ടിലെ സംഘാടകരായ ഹരീഷ് തൊടുപുഴയെയും നിരക്ഷരനേയും ഏല്‍പ്പിച്ചു.

നാ‍ട്ടിലെത്തിയപാടെ നിരക്ഷരന്‍ ചാര്‍ട്ട് പേപ്പര്‍ മാത്രമല്ല, ലിസ്റ്റിലുണ്ടായിരുന്ന സകല സാധനങ്ങളും വീണ്ടും വാങ്ങി! ഓരോ ഓര്‍മ്മപ്പിശകുകള്‍. സാരമില്ല, ഉപകാരപ്പെടുന്ന സാധനങ്ങള്‍ തന്നെയാണല്ലോ. എങ്കിലും സജ്ജീവേട്ടന്‍ മീറ്റ് ദിവസം മറ്റെന്തെങ്കിലും തിരക്കുകാരണം വരാതിരിക്കുമോ എന്ന് വെറുതെ ആശങ്കപ്പെട്ട് ഒന്നു രണ്ടുതവണ ഞങ്ങള്‍ വിളിക്കുകയും ചെയ്തു. മീറ്റ് ദിവസം എത്തി. പ്രതീക്ഷകള്‍ തെറ്റിയില്ല. ഒന്‍പതരയായപ്പോഴേക്ക് കൈയ്യില്‍ കുറേ പേപ്പറുകളും തോളിലൊരു ബാഗും, പോക്കറ്റില്‍ കുറേ മാര്‍ക്കറുകളുമായി സജ്ജീവേട്ടന്‍ സ്ഥലത്തെത്തി.
(ഫോട്ടോഗ്രാഫര്‍ : മണികണ്ഠന്‍)

നേരെ രജിസ്ട്രേഷന്‍ കൌണ്ടറിലേക്ക്. ഇത്രയും ഭാരമേറിയ ദേഹം അദ്ദേഹം ഒരു ബഞ്ചിലുറപ്പിച്ചതും ബഞ്ച് പൂഴിമണ്ണിലേക്ക് താണു. ചുമ്മാതല്ല, ഏറ്റവും ഭാരമേറിയ മലയാളം ബ്ലോഗര്‍ എന്ന പദവി അദ്ദേഹത്തിനു തന്നെ ലഭിച്ചത്.

(ഫോട്ടോഗ്രാഫര്‍ : നന്ദകുമാര്‍ നന്ദപര്‍വ്വം)

സജ്ജീവേട്ടന്റെ കാരിക്കേച്ചര്‍ വര ഒഫീഷ്യലായി ആരംഭിച്ചത് ജി.മനുവിന്റെ ചിത്രംവരച്ചു കൊണ്ടായിരുന്നുവെങ്കിലും അതിനു മുമ്പുതന്നെ അദ്ദേഹം അവിടെ വരതുടങ്ങേണ്ടിവന്നു എന്നതാണു സത്യം. ഞങ്ങളുടെ അഞ്ചുവയസ്സുകാരന്‍ മനുക്കുട്ടന്‍ സജ്ജീവേട്ടനെ കണ്ടതും അവന്റെ കാര്‍ട്ടൂണ്‍ വരയ്ക്കാമോ എന്നുചോദിച്ച് നിര്‍ബന്ധം തുടങ്ങി. ഒട്ടും താമസിക്കാതെ അവനെ മുന്നില്‍ നിര്‍ത്തി ഒരു കൊച്ചുപേപ്പറില്‍ സജ്ജീവേട്ടന്‍ അവന്റെ കാരിക്കേച്ചര്‍ വരച്ചു.

പരിചയപ്പെടിലിനുശേഷം സജ്ജീവേട്ടനു കാരിക്കേച്ചര്‍ ഡെമോ കാണിക്കുവാനായി ഒരു മേശ ചരിച്ചുവച്ച് അതിലേക്ക് ഒരു ചാര്‍ട്ട് പേപ്പര്‍ ഡ്രോയിംഗ് പിന്‍ വച്ച് ഉറപ്പിച്ചു. ജി.മനുവിന്റെ ചിത്രം വരച്ചുകൊണ്ടായിരുന്നു തുടക്കം. നിമിഷങ്ങള്‍ക്കുള്ളില്‍ ജി.മനുവിന്റെ മാനറിസങ്ങള്‍ അതേപടി പകര്‍ത്തി സജ്ജീവേട്ടന്‍ എല്ലാവരേയും അത്ഭുതസ്തബ്ദ്ധരാക്കിക്കളഞ്ഞു ! അതിനു ശേഷം ഒരു മാരത്തോണ്‍ വരയാണ് മഹാനായ ഈ ചിത്രകാരന്‍ കാഴ്ചവച്ചത്. മീറ്റ് സ്ഥലത്ത് വന്നുകൂടിയ നൂറ്റിപ്പതിനെട്ടോളം ആളുകളുടെ ചിത്രങ്ങള്‍ അടുത്ത നാലുമണിക്കൂറുകൊണ്ട് അദ്ദേഹം വരച്ചുപൂര്‍ത്തിയാക്കി. ഒരു പക്ഷേ ഒരു വേള്‍ഡ് റിക്കോര്‍ഡ് തന്നെയാവാം ഇത്.

(ഫോട്ടോഗ്രാഫര്‍: നന്ദന്‍, നന്ദപര്‍വ്വം)

സജ്ജീവേട്ടാ, ചെറായില്‍ മീറ്റില്‍ പങ്കെടുത്ത എല്ലാവരുടെയും പേരില്‍ ആ കഴിവിനുമുമ്പില്‍ തൊപ്പിയൂരിനിന്ന് ഒരു വണക്കം, സലാം....!! അഭിനന്ദനങ്ങള്‍!!! നന്ദി !!!!!

സജ്ജീവേട്ടന്റെ ഒരു അഭ്യര്‍ത്ഥന ചെറായിയില്‍ വന്നു കൂടിയ എല്ലാവരോടുമായി ഉള്ളത് പ്രസിദ്ധീകരിക്കുവാന്‍ കൂടിയാണ് ഈ പോസ്റ്റ്. അദ്ദേഹത്തിന്റെ തന്നെ വാക്കുകള്‍ ശ്രദ്ധിക്കൂ:

പ്രിയപ്പെട്ട ചെറായി കൂട്ടുകാരെ,

ഒരു അഭ്യര്ഥന.
കയ്യില് ക്യാമറ കരുതിയിരുന്നെങ്കിലും, ആ തിരക്കില് ഒരു പടം പോലും എടുക്കാനാവാതെ പോയ കക്ഷിയാണ് ഞാന്. ഓരോ ബ്ലോഗറും തന്റെ ചിത്രവും പിടിച്ചു നില്ക്കുന്ന ഒരു പടം എടുക്കണമെന്നുണ്ടായിരുന്നു. വരയ്ക്കുന്ന വീഡിയോയും കിട്ടിയിരുന്നെങ്കില് എന്നുമുണ്ട്.
ഹെന്താപ്പൊ ചെയ്യ്യ.
ഹന്ത ഭാഗ്യം ജനാനാം !:(

അതുകൊണ്ട്....

ക്യാരിക്കേച്ചര് വരച്ചുതന്നവര് അതിന്റെ ഒരു ക്ലിയര് സ്കാന്ഡ് കോപ്പിയൊ, അതിന്റെ ഒരു ഡിജിറ്റല് പടമൊ, പറ്റുമെങ്കില് അതും കയ്യിലേന്തിനില്ക്കുന്ന ഒരു ചിത്രമൊ ദയവായി ഉടന് ഒന്നെനിക്കയച്ചു തരുമൊ ?

ഞാന് ഇത്തരം ചിത്രങ്ങള് സൂക്ഷിക്കുന്നുണ്ട്. പടം അവിടെ വെച്ച് എടുക്കാനാവുമായിരുന്നില്ല എന്നത് എല്ലാവര്ക്കും അറിയാമല്ലൊ.
അതുകൊണ്ടാണീ അഭ്യ..... :)

ദയവായി ഇതിനെ നിസ്സാരമായി തള്ളിക്കളയാതിരിയ്ക്കണേ :)

അയയ്ക്കേണ്ടത്:
sajjive@gmail.com
അല്ലെങ്കില്
Sajjive Balakrishnan,
D-81, Income Tax Quarters,
Panampilly Nagar,
Kochi-682036
Mob: 94477-04693

അതുകൊണ്ട്, ഈ പോസ്റ്റ് കാണുന്ന എല്ലാ ചെറായിക്കൂട്ടുകാരും താന്താങ്ങള്‍ക്കു വരച്ചുകിട്ടിയ കാരിക്കേച്ചറിന്റെ ഒരു ഫോട്ടോ അല്ലെങ്കില്‍ സ്കാന്‍ കോപ്പി സജ്ജീവേട്ടനു എത്രയും വേഗം മെയില്‍ അറ്റാച്ച്മെന്റായി അയച്ചുകൊടുക്കുവാന്‍ താല്പര്യപ്പെടുന്നു....കേട്ടോ.

ഡെപ്ത് ഓഫ് ഫീൽഡ് - ഭാഗം 1

2009-07-14T15:26:00.001+05:30

ഡെപ്ത് ഓഫ് ഫീൽഡ് എന്ന ലെൻസ് എഫക്റ്റിന്റെ സാങ്കേതിക കാര്യങ്ങൾ വിശദീകരിക്കുന്ന പുതിയ പോസ്റ്റ് കാഴ്ചക്കിപ്പുറം ബ്ലോഗിൽ

ലിങ്ക് ഇവിടെ

സ്വപ്നങ്ങൾ ഈണങ്ങളായ കഥ .....

2009-07-01T18:57:00.005+05:30

ഈ കഥ കുറേ കുട്ടികളുടെ കഥയാണ്.....

വ്യത്യസ്ത ദേശങ്ങളിൽ, വ്യത്യസ്ത കുടുംബങ്ങളിൽ ജനിച്ചവരായിരുന്നു അവർ. ചെറുപ്പത്തിൽ അവർ തമ്മിൽ ഒരു പരിചയമില്ലായിരുന്നു. എങ്കിലും ഈ കഥയുടെ തുടക്കത്തിലേക്ക് അവരെയെല്ലാവരെയും കൊണ്ടുവരുവാൻ കാരണമായ ഒരു പൊതുസ്വഭാവവിശേഷമുണ്ടായിരുന്നു അവർക്ക്. സംഗീതത്തോടുള്ള അതിയായ സ്നേഹം. റേഡിയോയിൽ നിന്നും ഉത്സവപ്പറമ്പുകളിലെ മൈക്ക് സെറ്റുകളിൽനിന്നും ഒഴുകിയെത്തിയിരുന്ന ഗാനവീചികൾ അവർ മനഃപ്പാഠമാക്കി. വാൿമാനും, എം‌പിത്രീ പ്ലേയറും അവരുടെ സ്വപ്നങ്ങളിൽ പോലുമില്ലാതിരുന്ന ഒരു കാലത്ത് മനസ്സിലെ സംഗീതം അവർ മൂളിപ്പാട്ടായി പാടി. സംഗീതവേദികളിൽ ഹാർമോണിയവും തബലയുമൊക്കെ ശ്രുതിമീട്ടിയപ്പോൾ കൌതുകത്തോടെ നോക്കിനിന്നു. അവരുടെയെല്ലാം മനസ്സുകളിൽ അന്നേ ഒരു സ്വപ്നമുണ്ടായിരുന്നു. എനിക്കും ഒരു ഗായകനാവണം, ഗായികയാവണം എന്ന്. മുതിർന്നപ്പോൾ പലരുടെയും സ്വപ്നങ്ങൾ ചിറകുമുളച്ചു പറക്കുവാൻ തുടങ്ങി. അവർ സ്വന്തമായി ഗാനങ്ങൾ ട്യുൺ ചെയ്തു, ചിലർ ഗാനങ്ങളെഴുതി, മറ്റു ചിലർ പാട്ടുപാടുന്നതിൽ ആനന്ദം കണ്ടെത്തി. ചിലർ ‘നടക്കാത്ത സ്വപ്നമെന്നു’ വിധിയെഴുതി സംഗീത ആൽബങ്ങൾ എന്ന സ്വപ്നത്തെ മനസ്സിന്റെ അടിത്തട്ടിൽ മണിച്ചിത്രതാഴിട്ട് പൂട്ടി സൂക്ഷിച്ചുവച്ചു.

കടന്നു പോകവേ അവരെല്ലാവരും ജീവിതത്തിന്റെ വിവിധ വഴിത്തിരിവുകളില്‍ വച്ച് പല ഭൂഖണ്ഡങ്ങളിലെ വിവിധ രാജ്യങ്ങളിൽ എത്തിച്ചേർന്നു. യാദൃശ്ചികമായി എന്നുതന്നെ പറയാം, അവരെല്ലാവരും ഒരു വലിയ വലയുടെ കണ്ണികളിൽ എപ്പോഴൊക്കെയോ വന്നുപെട്ടു - ഇന്റർനെറ്റ് എന്ന അത്ഭുതവലയിൽ. വലക്കണ്ണികളിലൂടെ അവർ പരിചയപ്പെട്ടു, ആശയങ്ങള്‍ പങ്കുവച്ചു. ബ്ലോഗ് എന്ന മാധ്യമത്തിലൂടെ അവർ പാടി. വലക്കണ്ണികളിലൂടെ ആ ഗാനവീചികൾ സഞ്ചരിച്ച് വലയുടെ മറ്റുഭാഗങ്ങളിലിരുന്നവർ കേട്ടാസ്വാദിച്ചു. അവരില്‍ ചിലര്‍ ചേർന്ന് ഒരു പുതിയ സംരംഭം വിഭാവനം ചെയ്തു - ഒരു ഓൺ‌ലൈൻ സ്വതന്ത്ര സൌജന്യ സംഗീത ആൽബം. ആ സ്വപ്നങ്ങൾ ഈണങ്ങളായി ഒഴുകി. “ഈണം” എന്ന സ്വതന്ത്ര-സംഗീത ആൽബത്തിന്റെ പിറവി അങ്ങനെയായിരുന്നു.

മലയാളം ബ്ലോഗിംഗ് രംഗത്തെ ഗായകരും സംഗീതജ്ഞരും കൈകോർക്കുന്ന മലയാളത്തിലെ ആദ്യ സ്വതന്ത്ര സംഗീത സംരംഭമാണിത്. സ്വന്തമായി അണിയിച്ചൊരുക്കിയ ഗാനങ്ങൾ സൗജന്യ മായി ആസ്വാദകരിലേക്കെത്തിക്കുക എന്ന ലക്ഷ്യത്തിനായി കൈമെയ് മറന്നിറങ്ങിയ ഒരു കൂട്ടം സംഗീത പ്രേമികളുടെ സ്വപ്നപദ്ധതി - അതാണ് “ഈണം“ എന്ന ഓൺ‌ലൈൻ സംഗീത ആൽബം ഇന്ന് ബൂലോകത്തിനു മുമ്പിൽ സമർപ്പിച്ചപ്പോൾ അതിന്റെ അണിയറപ്രവർത്തകർ യാഥാർത്ഥ്യമാക്കിയത്.

ബ്ലോഗിംഗ് രംഗത്ത് പോഡ്‌കാസ്റ്റ് എന്ന ആശയം പണ്ടേ നിലവിലുണ്ടായിരുന്നുവെങ്കിലും, ആ സൌകര്യം പ്രയോജനപ്പെടുത്തിക്കൊണ്ട് മലയാളം ബ്ലോഗിൽ ആദ്യമായി ബ്ലോഗിൽ ഗാനങ്ങൾ പോസ്റ്റ് ചെയ്തു തുടങ്ങിയത് ബ്ലോഗിലെ ഗായകരിൽ ഒരാളായ കിരൺസ് ആയിരുന്നു. കിരണിന്റെ കരോക്കേ അകമ്പടിയോടെയുള്ള മെലഡികൾ സംഗീതാസ്വാദകർ തുടക്കം മുതൽ തന്നെ പ്രോത്സാഹിപ്പിച്ചിരുന്നു. കരോക്കെ ഉപയോഗിച്ചുകൊണ്ട് പാട്ടുകൾ കമ്പ്യൂട്ടറിൽ റിക്കോർഡ് ചെയ്യുവാനും, അത് പോഡ്‌കാസ്റ്റ് ആയി പ്രസിദ്ധപ്പെടുത്തുവാനും ഉള്ള വിശദമായ മാർഗ്ഗ നിർദ്ദേശങ്ങളോടെ കിരൺസ് തയ്യാറാക്കി ബ്ലോഗിൽ പ്രസിദ്ധീകരിച്ച പോസ്റ്റുകൾ അനേകം ഗായകരെയും സംഗീതജ്ഞരേയും ബൂലോകത്തിനു സമ്മാനിച്ചു എന്നതു തർക്കമില്ലാത്ത കാര്യമാണ്.

അങ്ങനെ ബ്ലോഗ് എന്ന മാധ്യമം വഴി പരിചയപ്പെട്ട, വിവിധ രാജ്യങ്ങളിൽ താമസിക്കുന്ന മലയാളസംഗീത പ്രേമികളുടെ മനസ്സിൽ ഉരുത്തിരിഞ്ഞുവന്ന ഒരാശയമായിരുന്നു മലയാളഗാനങ്ങൾക്കായി ഇന്റർനെറ്റിൽ ഒരു സ്വതന്ത്ര സംഗീത സംരംഭം എന്നത്. ബഹുവ്രീഹിയുടെ സംഗീത സംവിധാന പരീക്ഷണങ്ങളാണ് ഈണത്തിന്റെ ആദ്യ തീപ്പൊരി എന്നു പറയാം.ബഹുവും കിരണും പ്രതിഭാധനനായ ഗായകൻ രാജേഷും ഒരുമിച്ചു ചേർന്നതോടെ അതൊരു കൂട്ടായ സംരംഭമാക്കാം എന്നവർ തീരുമാനിച്ചു. ഭക്തിഗാന പബ്ലിഷിംഗ് രംഗത്ത് പ്രൊഫഷണൽ പരിചയമുള്ള നിശീകാന്ത് (ചെറിയനാടൻ ) മലയാളം ബ്ലോഗ് രംഗത്ത് എത്തിയതോടെ ലക്ഷ്യത്തിലേക്കുള്ള മുന്നേറ്റമായി. നിരന്തരമായ ചർച്ചകളിലൂടെ എന്ത് – എങ്ങനെ ചെയ്യണം എന്നുള്ള വ്യക്തമായ ലക്ഷ്യം രൂപപ്പെടുത്തി. 2009 ജൂൺ മാസത്തിൽ ഈണത്തിന്റെ ആദ്യ ഗാനസമാഹാരം പുറത്തിറക്കണം എന്ന ലക്ഷ്യത്തോടെ അവർ പ്രവർത്തനങ്ങൾ ആരംഭിച്ചു. ആദ്യസമാഹാരത്തിൽ ഒൻപതു ഗാനങ്ങൾ ഉണ്ടാവണമെന്നും അവ ഒൻപതു വ്യത്യസ്ത തീമുകളെ ആസ്പദമായി ആയിരിക്കണമെന്നും തീരുമാനിച്ചിരുന്നു. അതനുസരിച്ച് നിലവിൽ ബ്ലോഗിലെ അറിയപ്പെടുന്ന ഗായകരേയും ഗാന /കവിതാ രചയിതാക്കളേയും മറ്റും ഇതിനായി ബന്ധപ്പെട്ടു. ‘സകല കലാവല്ലഭൻ‘ എന്ന പേരിനു സര്‍വ്വഥാ യോഗ്യനായ എതിരൻ കതിരവൻ എന്ന ബ്ലോഗര്‍ ആയിരുന്നു പലപ്പോഴും ഇവർക്ക് ആവശ്യമായ മാർഗ്ഗനിർദ്ദേശങ്ങള്‍ നൽകിക്കൊണ്ടിരുന്നത്.

ഈണത്തിന്റെ ലക്ഷ്യം വളരെ വ്യക്തമായിരുന്നെങ്കിലും അണിയറപ്രവർത്തകരെല്ലാവരും വ്യത്യസ്ത രാജ്യങ്ങളിൽ ആയിരുന്നു എന്നത് ഒരു പ്രതിസന്ധിയായിരുന്നു. ഇന്റർനെറ്റിന്റെ അനന്തസാധ്യതകൾ ബുദ്ധിപൂർവ്വം ഉപയോഗിച്ചപ്പോൾ കടമ്പകളെല്ലാം ഓരോന്നായി ഇല്ലാതെയായി. ഈ ആൽബത്തിലെ ‘വാർമഴവില്ലിന്റെ...” എന്നുതുടങ്ങുന്ന ഗാനത്തിന്റെ രചയിതാവായ ബൈജു പറയുന്നതുകേൾക്കൂ:

“വിഷാദഗാനം‘ എന്ന തീം ആയിരുന്നു എനിക്ക് നൽകിയിരുന്നത്. അകാലത്തിൽ പൊലിഞ്ഞുപോയ തന്റെ പ്രിയതമയെ ഓർത്തുകൊണ്ട് കഥാനായകൻ പാടുന്നതായി സങ്കൽ‌പ്പിച്ചുകൊണ്ടെഴുതിയ വരികൾ പിറ്റേന്നുതന്നെ ഗൂഗിള്‍ പോസ്റ്റില്‍ ഇംഗ്ലണ്ടിലുള്ള രാജേഷിന്റെ അടുത്തേക്ക് പറന്നു. അദ്ദേഹമാണ് ഈ ഗാനത്തിന് ഈണം നൽകാം എന്നേറ്റിരിക്കുന്നത്. സമയത്തിലുള്ള വ്യത്യാസം കാരണം, പിന്നീടുള്ള ചര്‍ച്ചകളൊക്കയും നിശിയേട്ടനു (ചെറിയനാടന്‍) മായായിരുന്നു. ഗാനത്തിന്റെ ഈണം ചര്‍ച്ചചെയ്യപ്പെട്ടു എന്നും, ചില്ലറ വ്യത്യാസങ്ങള്‍ വരുത്തേണ്ടതുണ്ടെന്നും അറിഞ്ഞു. തനനാനാ പാടി നിശിയേട്ടന്‍ കൂടെയുണ്ടായതിനാല്‍, ഗൂഗിളമ്മച്ചിയുടെ മടിയിലിരുന്നു സ്വകാര്യം പറയുന്നതിന്നിടയില്‍ ഗാനവും പൂര്‍ത്തിയായി.“

ദിവസങ്ങൾക്കുള്ളിൽ തന്നെ ഗാനത്തിന്റെ ഒരു എം‌പിത്രീ ഫയൽ ഖത്തറിലുള്ള കിരണിന്റെ കമ്പ്യൂട്ടറിലേക്ക് എത്തി. അദ്ദേഹം അത് പാടിനോക്കി അഭിപ്രായങ്ങൾ പറഞ്ഞു. ഗാനങ്ങളും ട്യൂണുകളും മാറ്റങ്ങളും വഹിച്ചുകൊണ്ട് ഫയലുകള്‍ ഇന്റര്‍നെറ്റിലൂടെ അങ്ങോട്ടും ഇങ്ങോട്ടും ടീം അംഗങ്ങളുടെ കമ്പ്യൂട്ടറുകളിലേക്ക് പൊയ്ക്കൊണ്ടേയിരുന്നു. ഈ രീതിയിലായിരുന്നു പിന്നീട് ഇതിലെ ഓരോ ഗാനവും ചിട്ടപ്പെടുത്തിയത്.

ഓരോ ഗാനങ്ങളുടെയും ഓർക്കസ്ട്രെഷൻ പുർത്തിയാകുന്നതിനനുസരിച്ച് അതാതിനായി നിശ്ചയിട്ടുള്ള ഗായകർക്ക് അയച്ചുകൊടുക്കുകയും ട്രയൽ വേർഷൻ ആവശ്യപ്പെടുകയും ചെയ്തു. എല്ലാവരും നന്നായി സഹകരിക്കുകയും ഈണം ടീം ഉദ്ദേശിച്ച സമയത്ത് എല്ലാം ലഭ്യമാവുകയും ചെയ്തു. തുടർന്ന് ഈണം ടീം എടുത്ത ഒരു സുപ്രധാന തീരുമാനം ഈ ഗാനങ്ങളുടെ ഇപ്പൊഴത്തെ മനോഹാരിതക്ക് സുപ്രധാന കാരണമായിട്ടുണ്ട്. പ്രകാശ് കുമാർ എന്ന പ്രൊഫഷനൽ കമ്പോസർക്ക് പ്രസ്തുത ഗാനങ്ങൾ അയച്ചു കൊടുത്ത്, ഈണം ടീമിലെ സംഗീത സംവിധായകര്‍ ചെയ്തിരിക്കുന്ന പോലെതന്നെ ബാക്ഗ്രൌണ്ട് മ്യൂസിക്ക് തയാറാക്കുവാനാവശ്യപ്പെട്ടു. അവയെല്ലാം കരോക്കെ ട്രാക്കുകൾ പോലെ തയ്യാറായിക്കഴിഞ്ഞപ്പോൾ ആൽബത്തിന്റെ ആദ്യപടി പൂർത്തിയായി.

ഓൺലൈനിൽ കേൾക്കുക, ഫ്രീയായി ആവശ്യക്കാർക്ക് ഡൌൺ‌ലോഡ് ചെയ്ത് എടുക്കുക എന്നീ ലക്ഷ്യങ്ങളേ ഇതിനുണ്ടായിരുന്നുള്ളൂവെങ്കിലും ഇത്തരം ഒരു സംരഭം ആരംഭിക്കുമ്പോൾ അത് കഴിയുന്നത്ര നല്ല നിലവാരത്തിൽ പുറത്തിറക്കണമെന്ന് ‘ഈണം‘ ടീമിനു നിർബന്ധമുണ്ടായിരുന്നു. അതിനാൽ ഗായകർ കേരളത്തിൽ വരുന്നുണ്ടെങ്കിൽ ആസമയത്ത് അതാതു ഗാനങ്ങളുടെ ഓഡിയോ ട്രാക്ക് പാടി റിക്കോർഡ് ചെയ്യൂന്നതിനും, കേരളത്തിൽ ഇല്ലാത്ത ഗായകരെക്കൊണ്ട് പാടിച്ചു നാട്ടിലേക്കെത്തിച്ച ഓഡിയോ ട്രാക്കുകളുടെ മിക്സിംഗ് ചെയ്യുവാനും തീരുമാനമായി. അങ്ങനെ ഒട്ടനവധിആളുകളുടെ അക്ഷീണപരിശ്രമത്തിന്റെയും സ്ഥിരോത്സാ‍ഹത്തിന്റെയും ഫലമായാണ് ഈ മനോഹര ഗാനസമാഹാരം നമ്മുടെ മുമ്പിൽ എത്തിയിരിക്കുന്നത്.

“ഈണ”ത്തിനു സ്വന്തമായി ഒരു വെബ്സൈറ്റ് ഉണ്ട്. www.eenam.com എന്നാണ് അതിന്റെ യു.ആർ.എൽ. മലയാളത്തിലോ ഇംഗ്ലീഷിലോ ഇതിലെ ടെക്സ്റ്റ് കാണുവാനുള്ള സംവിധാനം അവിടെയുണ്ട്. ഗാനങ്ങൾ കേൾക്കുന്നതോടൊപ്പം അവയുടെ വരികൾ കാണുവാനുള്ള സംവിധാനവുമുണ്ട്. പ്ലേയറിന്റെ താഴെയായി കാണുന്ന “ഓരോ പാട്ടിന്റെ വരികൾക്കും വിശദവിവരങ്ങൾക്കും ഇവിടം സന്ദർശിക്കുക” എന്ന വരിയിലെ ഇവിടം എന്ന ലിങ്കിൽ മൌസ് വച്ച് റൈറ്റ് ക്ലിക്ക് ചെയ്തശേഷം Open in new tab എന്ന ഓപ്ഷൻ സെലക്റ്റ് ചെയ്താൽ പാട്ടു കേൾക്കുമ്പോൾ തന്നെ വരികളും നിങ്ങൾക്ക് വായിക്കാവുന്നതാണ് - അവിടെയും മലയാളം ടെക്സ്റ്റ് ഉണ്ട്. ഓരോ പാട്ടിന്റെയും പേജിലും പ്ലേയർ ലഭ്യമാണ്.

ഗാനങ്ങളിലൂടെ ഒരു ഓട്ടപ്രദക്ഷിണം:

ഇടിയുടേയും കാറ്റിന്റെയും അകമ്പടിയോടെ ആർത്തുപെയ്യുന്ന ഒരു മഴയുടെ ശബ്ദമുഖരിമയോടെയാണ് ആദ്യഗാനം തുടങ്ങുന്നത്. പാടത്തും തോട്ടിലും വെള്ളം പൊങ്ങി, മടപൊട്ടിപ്പായുമ്പോൾ അതടയ്ക്കുവാൻ ജീവൻ പണയപ്പെടുത്തിക്കൊണ്ട് യാത്രയാകുന്ന കർഷകന്റെയും അവന്റെ ഭാര്യയുടെയും സംഭാഷണങ്ങളിലെ ആധികളും പ്രതീക്ഷകളും ഭംഗിയായി ഇതിലെ വരികളിൽ പാമരൻ കോറിയിട്ടിരിക്കുന്നു. ആ രംഗത്തിന് അനുയോജ്യമായ ഒരു മ്യുസിക് നൽകുന്നതിൽ സംഗീത സംവിധായകൻ ബഹുവ്രീഹി വിജയിച്ചിരിക്കുന്നു. വരികളുടെ ഭാവം ഉൾക്കൊണ്ടുകൊണ്ടുതന്നെ ആലാപനം നിർവ്വഹിച്ചിരിക്കുന്നു രശ്മി നായരും ബഹുവ്രീഹിയും.

ദിവ്യാമേനോനും ശ്രീകാന്തും ചേർന്നാലപിച്ചിരിക്കുന്ന ഒരു പ്രണയ യുഗ്മഗാനമാണ് ‘മൌനാനുരാഗം‘ എന്നാരംഭിക്കുന്ന രണ്ടാമത്തെ ഗാനം. “മൌനാനുരാഗം, ആദ്യാനുരാഗം, എന്നകതാരിൽ മീട്ടും നിൻ തന്ത്രികൾ, ആലോലലോലമായ് ശാലീനസന്ധ്യയിൽ, നിൻ മിഴികൾ പാടും രാഗശീലുകൾ“ ഡോണ മയൂര എഴുതിയ പ്രണയാദ്രമായ വരികൾക്ക് ഈണം നൽകിയിരിക്കുന്നത് ബഹുവ്രീഹി.

“ഹൃദയം അലിയും നാദം” എന്ന സെമിക്ലാസിക്കൽ ഗാനത്തിന് സംഗീതം നൽകിയിരിക്കുന്നതും ആലപിച്ചിരിക്കുനന്തും രാജേഷ് രാമനാണ്. വരികൾ നിശികാന്തിന്റേത്. മഴവില്ലിന്റെ ഏഴുനിറങ്ങളുടേയും സമ്മേളനമായുണ്ടാകുന്ന വെള്ളനിറമുള്ള വസ്ത്രത്തിൽ പൊതിഞ്ഞ് അന്ത്യയാത്രാകുന്ന പ്രിയതമയുടെ മൃതദേഹത്തിനു മുമ്പിൽ പ്രിയതമൻ അർപ്പിക്കുന്ന കണ്ണീർപ്പൂക്കളാണ് “വാർമഴവില്ലിന്റെ” എന്ന ഗാനത്തിലൂടെ കിരൺസ് നമ്മുടെ മനസ്സിലെത്തിക്കുന്നത്. ബൈജു എഴുതിയ ഈ ഗാനത്തിന് സംഗീതം നൽകിയിരിക്കുന്നത് രാജേഷ് രാമൻ.

ഉത്സവഗീതം എന്ന തീമിൽ തയ്യാറാക്കിയ ഗാനമാണ് “അനുരാഗസന്ധ്യാ കുങ്കുമം ചാർത്തിയ” എന്നാരംഭിക്കുന്ന ഗാനം. നിശികാന്ത് എഴുതി സംഗീതം നൽകിയിരിക്കുന്ന ഈ ഗാനം ആലപിച്ചിരിക്കുന്നത് ദിവ്യ പങ്കജ്. ഈ ഗാനത്തിന് ഉത്സവഗാനത്തിനേക്കാൾ ഒരു വസന്തഗീതം എന്ന ടൈറ്റിലാണ് ചേരുക. മനോഹരമായ ട്യൂണും ആലാപനവും ഈ ഗാനത്തെ വ്യത്യസ്തമാക്കുന്നു.

“മാരിവില്ലൂഞ്ഞാലിലാലോലമാടീ, കാര്‍മുകിലെങ്ങെങ്ങോ മാഞ്ഞൂ, ആരോമലുണ്ണിക്കിടാവിനെക്കാണാനിന്നായിരം താരങ്ങള്‍ വന്നൂ..“ എന്ന താരാട്ടുപാട്ടിന്റെ വരികളിലൂടെ ഒരു അമ്മയുടെ പ്രതീക്ഷകൾ വിവരിക്കുകയാണ് ‘ചന്ദ്രകാന്തം’ ബ്ലോഗിലൂടെ നമുക്ക് സുപരിചതയായ ചാന്ദ്നി ഗാനൻ. ഈ വരികൾക്ക് ചേരുന്ന മനോഹരമായ സംഗീതം നൽകിയിരിക്കുന്നത് ബഹുവ്രീഹിയാണ്. ശാന്തിയുടെ സുന്ദരമായ സ്വരമാധുരിയിൽ ഈ ഗാനം കേൾക്കുമ്പോൾ ഉറക്കം വരില്ല എന്നുതന്നെ പറയാം! അത്രയ്ക്ക് നല്ലൊരു ഗാനമാണത്.

കാലമാകുന്ന രഥത്തിലേറി എവിടേക്കെന്നറിയാതെ സ്വയം മറന്ന് മനുഷ്യര്‍ യാത്രചെയ്യുമ്പോൾ “ഹേ മനുഷ്യാ ......നിന്റെ അഹന്തയിവിടെ മരിക്കുന്നൂ- നീനേടിയ ജ്ഞാനം തോല്‍ക്കുന്നൂ.. “ എന്ന് ഓർമ്മിപ്പിക്കുകയാണ് ഗീതടീച്ചർ, “കാലമാം രഥമുരുളുന്നു” എന്ന വരികളിലൂടെ. സംഗീതം നൽകിയിരിക്കുന്നത് ഡോ.എൻ എസ് പണിക്കർ, പാടിയിരിക്കുന്നത് സുരേഷ്.

“നീലവാനിൻ മിഴിയിണയിൽ” എന്നാരംഭിക്കുന്ന ഭാ‍വഗീതമാണ് അടുത്തത്.

വാനിന്നിതളില്‍ നിറമണിയും
പരാഗമുറങ്ങും പൂവിരിയും
ഈറന്മിഴികള്‍ കാത്തിരിയ്ക്കും-ഒരു-
നോവുപടര്‍ത്തും മോഹവുമായ്
താരഹാരം മാഞ്ഞുവോ........

ദേവി പിള്ള എഴുതി, ബഹുവ്രീഹി സംഗീതം നൽകിയിരിക്കുന്ന ഈ വരികൾ പാടിയിരിക്കുന്നത് ജോസഫ് തോമസ്.

കമൽ ചിത്രങ്ങളിൽ നമുക്ക് പരിചിതമായ കാമ്പസ് ഗാനങ്ങളോടൊപ്പം ചേർത്തുവയ്ക്കാവുന്ന ഒരു ഗാനമാണ് “ചാറ്റ് റൂമിലെ ചാന്ദ്നി” എന്ന അവസാന ഗാനം. ഓർക്കുട്ടും, ചാറ്റും, മെയിലും, എസ്.എം.എസുമായി ഒരു വിർച്വൽ ലോകത്തു കഴിയുന്ന യുവതലമുറയുടെ എനർജി അപ്പാടെ ആവാഹിച്ചുവച്ചിരിക്കുന്നു ബ്ലോഗിലെ ഹാസ്യസാമ്രാട്ട് ജി.മനു ഈ വരികളിൽ. അനുയോജ്യമായ സംഗീതം നൽകിയത് രാജേഷ് രാമൻ. ആലപിച്ചിരിക്കുന്നത് ദിവ്യ പങ്കജ്, ദിവ്യ മേനോൻ, ജോസഫ്, രാജേഷ് എന്നിവർ ചേർന്ന്.

ഒൻ‌പതുകൂട്ടം കറികളുംകൂട്ടി വയറുനിറച്ചുണ്ട ഒരു ഊണിനുശേഷം തോന്നുന്ന സംതൃപ്തിയാണ് എനിക്കീ ഗാനങ്ങൾ കേട്ടപ്പോൾ തോന്നിയത്. പ്രൊഫഷനലായി ചെയ്തിരിക്കുന്ന ഒരു സംഗീത ആൽബത്തിന്റെ ഗുണമേന്മ ഇതിൽ നിന്നു പ്രതീക്ഷിക്കരുത്. കുറ്റമറ്റ ഒരു കലാസൃഷ്ടിയാണിതെന്ന് അതിന്റെ അണിയറപ്രവർത്തകർ പോലും അവകാശപ്പെടുന്നില്ല. എങ്കിലും അമച്വർ പ്രതിഭകൾ ചേർന്നൊരുക്കിയ ഈ സംരംഭം ഒരു തുടക്കമെന്ന നിലയിൽ ഗംഭീരവിജയം തന്നെയാണെന്നതിൽ സംശയമില്ല. പരിമിതികൾക്കുള്ളിൽ നിന്നുകൊണ്ട് ഇത് ഭംഗിയാക്കുവാൻ അവർ കാണിച്ച ആർജ്ജവത്വം തീർച്ചയായും അഭിനന്ദനമർഹിക്കുന്നു.

എം.പി.ത്രി ഫോർമാറ്റിലാണ് വെബ് സൈറ്റിൽ നിന്ന് ഈ ഗാനങ്ങൾ നമുക്ക് സൌജന്യമാ‍യി നമുക്ക് ലഭിക്കുന്നത്. നിങ്ങളുടെ ഇന്റർനെറ്റ് കണക്ഷന് അനുയോജ്യമായ രീതിയിൽ 64 കിലോബൈറ്റ് ആയോ 128 കിലോബൈറ്റ് ആയോ ഇവ ലഭിക്കും. ഡൌൺ‌ലോഡ് ചെയ്യുവാനായി ഈണം വെബ്‌സൈറ്റിലെ Downloads എന്ന പേജ് സന്ദർശിക്കുക. ഇവയുടെ റിക്കോർഡിംഗ് ക്വാളിറ്റി ഒട്ടും നഷ്ടപ്പെടാതെ ഒറിജിനൽ ഓഡിയോ സി.ഡി രുപത്തിലും ഇത് പുറത്തിറക്കാൻ ഈണം ടീം തയ്യാറെടുത്തുവരികയാണ് (ഇതു പക്ഷേ സൌജന്യമല്ല!)

വ്യക്തമായ ഉദ്ദേശലക്ഷ്യ ങ്ങളോടെ യാണ് “ഈണം” പുറത്തിറങ്ങുന്നത്. കഴിവുള്ള ഗായകർ ക്ക്, തങ്ങളുടെ ശബ്ദം പുറംലോകത്തേക്കെത്തിക്കുന്ന ഒരു സഹായിയായി, സ്വന്തം രചനകൾ പുസ്തകത്താളുകളിൽ അല്ലെങ്കിൽ ബ്ലോഗി ലെ പോസ്റ്റുകളിൽ മാത്രം ഒതുക്കി നിർത്തേണ്ടി രുന്ന പ്രതിഭാധനരായ എഴുത്തുകാർക്ക് ഒരു വേദിയായി, അക്ഷര ക്കൂട്ടങ്ങൾക്ക് സംഗീതം നൽകി അനുപമഗാനങ്ങളായി രൂപപ്പെടുത്താൻ കഴിയുന്ന പ്രതിഭാധനരായ യുവസംഗീത സംവിധായകർക്കൊരു സങ്കേതമായി “ഈണം” എന്നും ഉണ്ടാകും. അതിന് സംഗീതത്തെ സ്നേഹിക്കുന്ന സഹൃദ യരായ ഓരോ മലയാളിയുടേയും വലിയമനസ്സും, ഒപ്പം, സഹായ സഹകരണങ്ങളും ഉണ്ടാകണമെന്നാണ് ഈണം ടീമിന്റെ അഭ്യർത്ഥന.

പോസ്റ്റ് അവസാനിപ്പിക്കുന്നതിനു മുമ്പ് ഈണത്തിന്റെ അണിയറശില്പികളെ ഒന്നു പരിചയപ്പെടുത്താം.

ഗാനരചന :- ഡോണാ മയൂര,ഗീതാ ഗീതികൾ, ചാന്ദ്നി, ദേവിപിള്ള, പാമരൻ , ചെറിയനാടൻ , ജി മനു & ബൈജു ടി

സംഗീതം:- രാജേഷ് രാമൻ , ബഹുവ്രീഹി , എൻ എസ് പണിക്കർ & ചെറിയനാടൻ

പാടിയവർ :-ദിവ്യ മേനോൻ ,ദിവ്യ പങ്കജ്, രശ്മി നായർ, ശാന്തി , ശ്രീകാന്ത് ,രാജേഷ് രാമൻ ,സുരേഷ്, ജോ & കിരൺ .

അഡ്വൈസർ & കൺസൾട്ടന്റ് :- എതിരൻ കതിരവൻ

വെബ്ബ് സഹായം :- കെവിൻ സിജി

ഡിസൈൻ & ലോഗോസ് :- നന്ദകുമാർ & താഹാനസീർ

അങ്ങ് പടിഞ്ഞാറ് അമേരിക്കമുതൽ ഏഷ്യയുടെ വ്യത്യസ്ഥഭാഗങ്ങള്‍ വരെ പരന്നു കിടക്കുന്ന ഭൂവിഭാഗങ്ങളിലിരുന്നുകൊണ്ടാണ് ഈ കലാസ്നേഹികൾ ഈ സംഗീത സംരംഭം ഇത്രയും വിജയമാക്കിത്തീർത്തെന്നോർക്കുമ്പോൾ അവർക്ക് മുമ്പിൽ തൊപ്പിയൂരി ഒരു വണക്കം രേഖപ്പെടുത്തുവാനേ ആവുന്നുള്ളൂ - അതു പോരായെങ്കിലും ! അഭിനന്ദനങ്ങൾ കൂട്ടുകാരേ. ഈ ഒരുമ ഇനിയുമിനിയും അനവധി ഗാനസമാഹാരങ്ങൾ കൈരളിക്ക് സമ്മാനിക്കുവാൻ ഇടയാക്കട്ടെ എന്ന് ഇത്തരുണത്തിൽ ആത്മാർത്ഥമായി ആശിക്കുന്നു.

ഈണത്തിന്റെ ബ്ലോഗ് ഇവിടെ

അഭയക്കേസും വീഡിയോ ടേപ്പ് ‘കട്ടിംഗും’

2009-06-28T08:11:00.001+05:30

ആഗ്രിഗേറ്ററുകളിൽ വരാതെ പോയ ഒരു പോസ്റ്റ്

ലിങ്ക് ഇവിടെ

വീണോളൂ...പക്ഷേ എഴുനേല്‍ക്കണം !

2009-05-28T14:30:00.009+05:30

നിക്ക് വുയുജിച്ച് (Nick Vujicic)എന്നൊരാളെപ്പറ്റി നിങ്ങൾ കേട്ടിട്ടുണ്ടൊ? ഉണ്ടാവാം, ഇല്ലായിരിക്കാം.

പക്ഷേ അതിനുമുമ്പ് ഒരു ചോദ്യം. പ്രതിസന്ധികളിൽ തളരുന്നയാളാണോ നിങ്ങൾ? ജീവിതത്തിൽ പ്രതിസന്ധികൾ നേരിട്ട്, എങ്ങോട്ടുപോകണമെന്നറിയാതെ, എന്തുചെയ്യണമെന്നറിയാതെ, എവിടെനിന്നും ഒരു സഹായവും ലഭിക്കാതെ നിരാശയിലകപ്പെട്ട് ‘എനിക്കിങ്ങനെയൊരു ജീവിതം വേണ്ടായിരുന്നു’ എന്ന് ഒരിക്കലെങ്കിലും താങ്കൾ ചിന്തിച്ചിട്ടുണ്ടോ? നമുക്ക് ജീവിതത്തിൽ ലഭിച്ചിട്ടുള്ള സൌഭാഗ്യങ്ങളെയെല്ലാം ഒരു നിമിഷത്തേക്ക് മറന്നിട്ട്, ‘എനിക്കതില്ല, എനിക്കിതില്ല, എന്നാൽ അവന് / അവൾക്ക് അതെല്ലാം ഉണ്ട്’ എന്ന രീതിയിൽ സ്വയം പരിഭവിക്കാറുണ്ടോ നിങ്ങൾ? ഇതൊക്കെ നിങ്ങളും ചിന്തിക്കുന്ന കാര്യങ്ങളാണെങ്കിൽ ഇനിയുള്ള ഭാഗങ്ങൾ വായിച്ചുകഴിയുമ്പോൾ നിങ്ങളുടെ ധാരണകൾ ഒരു പക്ഷേ നിങ്ങൾ തിരുത്തിയേക്കാം. പ്രതിസന്ധികളിൽ തളരാതെ നിരന്തരമായി പരിശ്രമിക്കുമെങ്കിൽ ജീവിതത്തിൽ നമ്മൾ ഒരു വിജയമായിരിക്കും എന്ന് നമ്മെ ഒരിക്കൽ കൂടി ഓർമ്മപ്പെടുത്തുന്നു നിക്ക് വുയുജിച്ചിന്റെ കഥ.

1982 ഡിസംബർ 4 ന് ഓസ്ട്രേലിയയിലെ മെൽബണിൽ, ഒരു സൈബീരിയൻ-ക്രിസ്ത്യൻ കുടുംബത്തിലെ മൂത്തകുട്ടിയായാണ് നിക് വുയുജിച്ച് പിറന്നത്. ടെട്രാ-അമീലിയ എന്ന് വൈദ്യശാസ്ത്രം വിളിക്കുന്ന അത്യന്തം വിചിത്രമായ ഒരു വൈകല്യവുമായാണ് ആ കുഞ്ഞ് ജനിച്ചത്. തോൾ നിരപ്പിനുതാഴേക്ക് കൈകളില്ല; അരയ്ക്ക് താഴെ കാലുകളും. പകരം, ഇടതുതുടയോട് ചേർന്ന് രണ്ടു തള്ളവിരലുകളുള്ള ഒരു മാംസപിണ്ഡം മാത്രം. ആരോഗ്യമുള്ള ആ കൊച്ചു കുഞ്ഞിന് മറ്റു തകരാറുകളൊന്നുമില്ലായിരുന്നു. സ്വാഭാവികമായും അവന്റെ മാതാപിതാക്കൾ വല്ലാത്ത നിരാശയിലകപ്പെട്ടുപോയി.

കഷ്ടപ്പാടുകളും തടസ്സങ്ങളും നിറഞ്ഞതായിരിന്നു കൊച്ചു നിക്കിന്റെ തുടർന്നങ്ങോട്ടുള്ള ജീവിതം. ഓസ്ട്രേലിയയിലെ അന്നത്തെ നിയമം അനുസരിച്ച് ശാരീരിക വൈകല്യങ്ങളുള്ള കുട്ടികൾക്ക് പൊതുസ്കൂളുകളിൽ പ്രവേശനമില്ല. അങ്ങനെ അവൻ ശാരീരിക വൈകല്യങ്ങളുള്ള ഒരു സ്കൂളിൽ പോയിത്തുടങ്ങി. ഒന്നുരണ്ടു വർഷത്തിനുള്ളിൽ തന്നെ ഓസ്ട്രേലിയൻ സർക്കാർ നിയമം പരിഷ്കരിച്ചു. മാനസിക വൈകല്യമില്ലാത്ത, അംഗവിഹീനരായ കുട്ടികൾക്ക് പൊതുസ്കൂളുകളിൽ പവേശനം നൽകാം എന്ന് നിയമം വന്നു.അങ്ങനെ നിക്ക് ഒരു സ്കൂളിൽ ചേർന്നു. തന്റെ രണ്ടുവിരലുകൾ മാത്രം ഉപയോഗിച്ച് കൊച്ചുകൊച്ചു കാര്യങ്ങൾ ചെയ്യുവാൻ അവൻ പഠിച്ചു. ക്രമേണ എഴുതുവാനും, കമ്പ്യൂട്ടർ കീബോർഡ് ഉപയോഗിച്ച് ടൈപ്പ് ചെയ്യുവാനും പഠിച്ചു. എങ്കിലും സമൂഹത്തിൽ നിന്നുണ്ടായ ഒറ്റപ്പെടുത്തലുകൾ ആ എട്ടുവയസുകാരനു താങ്ങാവുന്നതിലും അപ്പുറത്തായിരിന്നു.

അങ്ങനെയിരിക്കേ ഒരു ദിവസം അവന്റെ അമ്മ നിക്കിനെ ഒരു പത്രവാർത്ത കാണിച്ചു. അംഗവൈകല്യത്താൽ നിസ്സഹായനായ ഒരു മനുഷ്യൻ ജീവിതവുമായി പൊരുതി ജയിക്കുന്നതിന്റെ വാർത്തയായിരുന്നു അത്. ലോകത്ത് ഈരീതിയിൽ കഷ്ടമനുഭവിക്കുന്നത് താൻ മാത്രമല്ല എന്ന തിരിച്ചറിവ് നിക്കിനുണ്ടാവുകയും, തന്റെ വൈകല്യത്തോട് പൊരുതി ജയിക്കുവാനുള്ള ദൃഢനിശ്ചയം എടുക്കുകയും ചെയ്തു. ക്രമേണ നിരന്തരമായ പരിശ്രമത്താൽ നിത്യജീവിതത്തിൽ ആവശ്യമായ എല്ലാക്കാര്യങ്ങളും പരസ്പരസഹായമില്ലാതെ ചെയ്യുവാൻ നിക്ക് പരിശീ‍ലിച്ചു.

പതിനേഴുവയസായപ്പോഴേക്ക് നിക്ക് അവരുടെ കുടുംബപ്രാർത്ഥനായോഗങ്ങളിൽ മറ്റുള്ളവർക്ക് ജീവിതത്തെപ്പറ്റി പ്രതീക്ഷയും, പ്രത്യാശയും നൽകുന്നരീതിയിൽ പ്രസംഗിക്കുവാൻ ആരംഭിച്ചു. ഏറെ താമസിയാതെ തന്നെ Life without limbs (കൈകാലുകളില്ലാതെ ഒരു ജീവിതം) എന്ന സന്നദ്ധ സംഘടന ആരംഭിച്ചു. ഇരുപത്തിയൊന്നാം വയസിൽ സാമ്പത്തിക ശാസ്ത്രത്തിൽ ബിരുദാനന്തരബിരുദത്തോടെ കോളജ് വിദ്യാഭ്യാസം അവസാനിപ്പിച്ചു നിക്ക്. തുടർന്ന് തന്റെ സംഘടനയുടെ പേരിൽ ലോകത്തിന്റെ പലഭാഗത്തും പ്രത്യാശയുണർത്തുന്ന പ്രസംഗങ്ങൾ (Motivational speech) നൽകുന്ന ഒരാളായി സഞ്ചരിക്കുവാൻ തുടങ്ങി. പ്രത്യേകിച്ച് വിവിധ രാജ്യങ്ങളിലെ സ്കൂളുകളിലും, കോർപ്പറേറ്റ് കമ്പനികളുടെ മീറ്റിംഗുകളിലും, ചർച്ചുകളിലും നിക്കിന്റെ പ്രസംഗം ഇന്ന് നടത്തപ്പെടുന്നുണ്ട് - ഒരു Motivational tool എന്ന നിലയിൽ. നിക്കിന്റെ സംഘടനയുടെ വെബ് സൈറ്റായ www.lifewithoutlimbs.org സന്ദർശിച്ചാൽ കൂടുതൽ വിവരങ്ങൾ ലഭിക്കും.

യുട്യൂബിൽ നിന്ന് വളരെ പോപ്പുലറായ ഒരു വീഡിയോ ക്ലിപ്പിംഗ് താഴെക്കൊടുക്കുന്നു. നിക്ക് വിയുജിച്ചിന്റെ ജീവിതത്തിൽ നിന്നുള്ള ചില ദൃശ്യങ്ങളും, അദ്ദേഹം ഒരു സ്കൂളിൽ നടത്തുന്ന പ്രഭാഷണവും നിങ്ങൾക്ക് അതിൽ കാണാം. ഈ വീഡിയോ കണ്ടതിനുശേഷം നാം ഒരു നിമിഷം ആലോചിച്ചുപോകും, വീഴ്ചകള്‍ സംഭവിക്കുമ്പോള്‍ നാം അതിനെ എങ്ങനെയാണ് നേരിടുക എന്ന്!

ഈ വീഡിയോയില്‍, നിക് താഴെവീണുകൊണ്ട് പറയുന്ന വാക്കുകള്‍ ശ്രദ്ധിക്കൂ. “ഞാന്‍ ഇപ്പോള്‍ മുഖമടിച്ചു വീണിരിക്കുന്നു. കൈകളോ കാലുകളൊ ഇല്ലാത്ത എനിക്ക് സാധാരണഗതിയില്‍ എഴുനേല്‍ക്കുവാന്‍ സാധ്യമല്ല. എങ്കിലും ഞാന്‍ പ്രതീക്ഷകൈവിടണമോ? ജീവിതത്തില്‍ ചിലപ്പോഴെങ്കിലും നിങ്ങളും ഇതുപോലെ വീണുപോയിട്ടുണ്ടാവില്ലേ? എഴുനേല്‍ക്കുവാന്‍ ശക്തിയില്ല എന്നു നിങ്ങള്‍ അപ്പോള്‍ ചിന്തിച്ചേക്കും. പക്ഷേ നാം പരാജയപ്പെടരുത്. ഒരു നൂറുവട്ടം ഞാന്‍ എന്റെ ശ്രമത്തില്‍ പരാജയപ്പെട്ടേക്കാം. എത്രപ്രാവശ്യം പരാജയപ്പെട്ടു എന്നതിലോ, എങ്ങനെയൊക്കെ ഞാന്‍ പരിശ്രമിക്കുന്നുവോ എന്നതിലല്ല കാര്യം. ഞാന്‍ ഉദ്ദേശിക്കുന്ന കാര്യം എങ്ങനെ പൂര്‍ത്തീകരിക്കുന്നു എന്നതിലാണ്. അതുകൊണ്ട് തളരാതെ പരിശ്രമിച്ചുകൊണ്ടേയിരിക്കുക”

ഈ വാചകങ്ങളുടെ അവസാനം, മൂക്ക് നിലത്തൂന്നിക്കൊണ്ട് നിക്ക് നിവര്‍ന്നിരിക്കുമ്പോള്‍ പ്രേക്ഷകരായ കുട്ടികള്‍ ഒരു പുതിയ പാഠം പഠിക്കുകയാണ്. ആ പാഠം നമുക്കും ഒരു പാഠമായിത്തീരട്ടെ.

original link

കടപ്പാട് : വിക്കിപീഡിയ (ഇംഗ്ലീഷ്)
ഈ യു-ട്യൂബ് ലിങ്ക് എനിക്ക് അയച്ചു തന്ന ഷിഹാബ് മൊഗ്രാൽ എന്ന എന്റെ പ്രിയ സുഹൃത്തിനും

കേരളത്തിലെ വോട്ടറന്മാര്‍ക്ക് ഒരു തുറന്ന കത്ത്

2009-04-16T08:40:00.006+05:30

പ്രിയപ്പെട്ട നാട്ടുകാരേ,

അങ്ങനെ ഒരുമാസത്തിലേറേയായി നാം കാത്തുകാത്തിരുന്ന ആ സുദിനം സമാഗതമായിരിക്കുന്നു! ജനാധിപത്യപരമായ നമ്മുടെ അവകാശംഎന്നല്ല നമ്മള്‍ ജനങ്ങളുടെ അധികാരം എന്നുതന്നെ പറയാവുന്ന വോട്ടവകാശം നമുക്ക് ഉപയോഗിക്കുവാനുള്ള സുവര്‍ണ്ണാവസരം വീണ്ടും ഒരിക്കല്‍ കൂടി നമുക്ക് ലഭിച്ചിരിക്കുകയാണ്. വോട്ടില്ലാത്ത ഞാന്‍ മറ്റൊരു നാട്ടില്‍ നിന്നും ഈ കത്ത് നിങ്ങള്‍ക്ക് എഴുതിക്കൊണ്ടിരിക്കുന്ന ഈ അവസരത്തില്‍ നിങ്ങളില്‍ പലരും പോളിംഗ് ബൂത്തുകള്‍ക്ക് മുമ്പില്‍ ക്യൂ നില്‍ക്കുവാനായുള്ള തത്രപ്പാടിലായിരിക്കും എന്നറിയാം. എങ്കിലും ഈ എഴുത്ത് നിങ്ങള്‍ സമയം പോലെ വായിക്കും എന്ന് ഞാന്‍ വിശ്വസിക്കുന്നു.

വോട്ടവകാശം എന്ന പരമാധികാരം ഈ ഒരു ദിവസത്തേക്കേ ഉള്ളൂവെന്നും, അതിനുവേണ്ടി താണുവീണു യാചിച്ചു നമ്മുടെമുമ്പില്‍ എന്തുംചെയ്യാന്‍ തയ്യാറായി നില്‍ക്കുന്ന രാഷ്ട്രീയക്കാരുടെ തനിസ്വഭാവം നാളെമുതല്‍ വീണ്ടും പഴയതുപോലെയാവുമെന്നും, നമ്മള്‍ വീണ്ടും അടിമത്തത്തിലേക്ക് പോകുമെന്നും ചില അരാഷ്ട്രീയന്മാര്‍ വാദിച്ചേക്കാം. അതൊന്നും തല്‍ക്കാലം നമ്മള്‍ കാര്യമാക്കേണ്ടതില്ല.

രാഷ്ട്രീയക്കാര്‍ കഷിഭേദമെന്യേ നമുക്ക വേണ്ടി ചെയ്തിട്ടുള്ള നല്ല കാര്യങ്ങള്‍ ഈ തെരഞ്ഞെടുപ്പുവേളയിലെങ്കിലും നമ്മള്‍ കണ്ടില്ലെന്ന് നടിക്കരുത് സുഹൃത്തുക്കളേ. ഇലക്ഷന്‍ പ്രഖ്യാപിച്ചതിനുശേഷം നാളിതുവരെ ഒരു ഹര്‍ത്താലാഘോഷം കാണുവാനുള്ള ഭാഗ്യം നമ്മള്‍ കേരളീയര്‍ക്ക് ഉണ്ടായില്ലെങ്കിലും, അതിനു മുമ്പ് ആഴ്ചയിലാഴ്ചയില്‍ എത്ര അപ്രഖ്യാപിത അവധികള്‍ ഈ പാ‍വം രാഷ്ട്രീയക്കാര്‍ ഹര്‍ത്താലെന്ന പേരില്‍ നമുക്ക് തന്നുകൊണ്ടിരുന്നതാണ്? ബെവറേജസ് കോര്‍പ്പറേഷന്റെ ഔട്ട്ലറ്റുകള്‍ക്കു മുമ്പില്‍ ക്യൂനിന്നു മദ്യക്കുപ്പികള്‍ വാങ്ങിക്കുടിച്ചൂം, സിനിമാ ഡിവിഡികള്‍ ഇഷ്ടം മാതിരി വാടകയ്ക്കെടുത്തുകണ്ടും നമ്മള്‍ ആദിനങ്ങളൊക്കെയും പൂര്‍ണ്ണവിജയങ്ങളാക്കിമാറ്റിക്കൊടുത്തു. ആ ദിവസങ്ങളില്‍ യാതൊരു വീണ്ടുവിചാരവുമില്ലാതെ ഹാര്‍ട്ട് അറ്റാക്കിനും, അപകടങ്ങള്‍ക്കും മറ്റും മുമ്പില്‍ ചെന്നു ചാടിയ ചിലരൊക്കെ സമയത്തിനു ചികിത്സകിട്ടാതെ മരിച്ചതും, എയര്‍പോര്‍ട്ടിലും റെയില്‍‌വേസ്റ്റേഷനിലും ദൂരെയാത്രയുക്കും മറ്റും പോകേണ്ടവര്‍ ഒരു ദിവസം മുമ്പേ യാത്രചെയ്യേണ്ടി വന്നതിനുമൊക്കെ നമ്മുടെ രാഷ്ട്രീയക്കാരെ കുറ്റം പറഞ്ഞിട്ടുകാര്യമുണ്ടോ? ജനാധിപത്യ വ്യവസ്ഥിതിയില്‍ ജനങ്ങള്‍ക്ക് പ്രതിഷേധമറിയിക്കാനുള്ള ഒരേഒരു മാര്‍ഗ്ഗമായ ഹര്‍ത്താല്‍ വേണ്ട എന്നുവയ്ക്കുന്ന കാര്യം ചിന്തിക്കാന്‍ പോലുമാവുന്നില്ല.

തൊട്ടതിനും പിടിച്ചതിനുമൊക്കെ സമരങ്ങള്‍, റോഡുകള്‍ പൂര്‍ണ്ണമായും സ്തംഭിപ്പിച്ചുകൊണ്ടുള്ള ജാഥകള്‍, പിരിവുത്സവങ്ങള്‍ ഇതൊക്കെ ഇടയ്ക്കിടെ നടത്തി നമ്മളെ സേവിച്ചുകൊണ്ടിരിക്കുന്ന ഈ രാഷ്ട്രീയക്കാരെ നിങ്ങള്‍ വെറുക്കരുത്. അവര്‍ നമ്മുടെ പ്രതിനിധികളാണ്. നമ്മുടെ വികസന സ്വപ്നങ്ങളാണ് അവരുടെയും സ്വപ്നങ്ങള്‍! ഒരുകൂട്ടര്‍ കാണുന്ന സ്വപ്നങ്ങള്‍ മറ്റൊരുകൂട്ടര്‍ക്ക് ഇഷ്ടമില്ലാതെ വന്നിരുന്നില്ലെങ്കില്‍ എന്താവുമായിരുന്നു സ്ഥിതി എന്നുചിന്തിച്ചുനോക്കൂ. നമ്മുടെ കേരളം എന്നേ വല്ല സ്വകാര്യ സംരഭകരും തീറെഴുതിവാങ്ങിക്കൊണ്ടുപോയേനെ.

എങ്കിലും എത്ര സ്വപ്നപദ്ധതികള്‍ക്കാണു നമ്മള്‍ ഇതുവരെ കല്ലിട്ടത്? അവസാനം കൊച്ചിയില്‍ സ്മാര്‍ട്ട് സിറ്റിക്കുവരെ ഒന്നരവര്‍ഷം മുമ്പ് നമ്മള്‍ കല്ലിട്ടു. കല്ലിട്ടുകഴിഞ്ഞുള്ള ബാക്കി പ്രവര്‍ത്തനങ്ങളൊക്കെ എന്തുകൊണ്ടാണ് നടക്കാത്തതെന്ന്മാത്രം ചോദിക്കരുത് സുഹൃത്തുക്കളേ. ചുവപ്പുനാടയും മെല്ലെപ്പോക്കും എന്നത് നമ്മുടെ സംസ്കാരത്തിന്റെതന്നെ ഭാഗമാണ് എന്ന് ആര്‍ക്കാണറിഞ്ഞുകൂടാത്തത്. അതൊക്കെ ഉദ്യോഗസ്ഥ ദുഷ്പ്രഭുക്കന്മാരുടെ ദുഷ്പ്രവര്‍ത്തികളാണെന്ന് പറഞ്ഞ് ആക്ഷേപിക്കുന്നവരുണ്ടാകാം. സംശയമുള്ളവര്‍ ഏതെങ്കിലും സര്‍ക്കാരാപ്പീസുകളില്‍ ഒരുദിവസമെങ്കിലും ഒന്നുപോയിനോക്കണം എന്നാണ് എനിക്ക് അഭ്യര്‍ത്ഥിക്കുവാനുള്ളത്. എത്രകൃത്യനിഷ്ഠതയോടെയാണ് ഈ പാവങ്ങള്‍ രാവിലെ ഓഫീസിലെത്തുന്നതെന്നും, വൈകിട്ട് അഞ്ചുമണീക്ക് വീട്ടില്‍ പോകുന്നതുവരെയുള്ള സമയം എത്ര ഔചിത്യപൂര്‍വ്വമായാണ് ഉപയോഗിക്കുന്നതെന്നും അപ്പോള്‍ നിങ്ങള്‍ക്ക് മനസ്സിലാകും. നമ്മള്‍ കൊടുക്കുന്ന നികുതിയിലധിഭാഗവും ഇത്ര സമര്‍ത്ഥരായ ഉദ്യോഗസ്ഥരുടെ ശമ്പളത്തിനായല്ലോ നീക്കിവയ്ക്കുന്നത് എന്നോര്‍ക്കുമ്പോള്‍ നിങ്ങള്‍ക്ക് തന്നെ അഭിമാനം തോന്നിപ്പോവുക സ്വാഭാവികം.

ഇത്രയും ശമ്പളം കൊടുത്ത് നമ്മള്‍ ജനങ്ങള്‍ നിയമിച്ചിരിക്കുന്ന ഈ ജനസേവക ഉദ്യോഗസ്ഥര്‍ പലപ്പോഴും നമ്മള്‍ തൊഴില്‍ ദാതാക്കളെ ഒരുമാതിരി യജമാനസ്വഭാവത്തോടെ കയറീ ഭരിക്കാന്‍ വരുന്നുണ്ടെന്ന് നിങ്ങള്‍ക്ക് തോന്നിക്കാണും. സാരമില്ല സുഹൃത്തുക്കളേ, എല്ലാവരും ഒരുപോലെ മോശമല്ലല്ലോ. ഇന്ത്യയ്ക്ക് സ്വാന്തന്ത്ര്യം ലഭിക്കുന്നതിനു മുമ്പ് തുടര്‍ന്നുവന്നിരുന്ന ചില ശീലങ്ങള്‍ അവരില്‍ ചിലര്‍ ഇപ്പോഴും തുടരുന്നതുകൊണ്ട് നമുക്കങ്ങനെ തോന്നുന്നതാണ്. നാംകൊടുക്കുന്ന ശമ്പളത്തിനു പുറമേ കിമ്പളം കൂടി അവരില്‍ ചിലര്‍ നമ്മളില്‍നിന്ന് ചില സേവനങ്ങള്‍ക്ക് പ്രതിഫലമായി ആവശ്യപ്പെടുന്നുണ്ടെന്നത് സത്യമാണ്. അതവരുടെ കുറ്റമല്ല. എളുപ്പം കാര്യങ്ങള്‍ സാധിക്കുവാനായി അവര്‍ ചോദിക്കുന്ന കിമ്പളം കൊടുക്കുവാന്‍ നമ്മളില്‍ പലരും ഒരുങ്ങുന്നതുകൊണ്ടാണ് ഇങ്ങനെയൊക്കെ സംഭവിക്കുന്നതെന്ന് ഞാന്‍ പറയാതെ തന്നെനിങ്ങള്‍ക്ക് അറിവുള്ളതാണല്ലോ.

അതവിടെ നില്‍ക്കട്ടെ. പ്രബുദ്ധരായ നമ്മുടെ രാഷ്ട്രീയനേതൃത്വങ്ങള്‍ ഈ സ്ഥിതിയൊക്കെ മാറ്റി മാവേലി നാടുവാണിരുന്ന കാലത്തെ അവസ്ഥ നമ്മുടെ കൊച്ചുമക്കളുടെകാലത്തെങ്കിലും ഉണ്ടാക്കിത്തരും എന്ന് നമുക്ക് സ്വപ്നംകാണാം. നമ്മള്‍ പറഞ്ഞുകൊണ്ടുവന്നത് വികസനസ്വപ്നങ്ങളെപ്പറ്റിയാണല്ലോ. ഇപ്രാവശ്യത്തെ ഇലക്ഷന്‍ പ്രചരണയോഗങ്ങളില്‍ എത്രയെത്ര വികസനസ്വപ്നങ്ങളാണ് നമ്മുടെ രാഷ്ട്രീപാര്‍ട്ടികള്‍ പങ്കുവച്ചതും ചര്‍ച്ച ചെയ്തതും എന്ന് നിങ്ങള്‍ക്കെല്ലാം ഞാന്‍ പറയാതെ തന്നെ അറിയാം. അവയില്‍ ചിലതുമാത്രം നിങ്ങളുടെ ഓര്‍മ്മയ്ക്കായി ഇവിടെ കുറിക്കട്ടെ. മദനിയുമായുള്ള എല്‍.ഡി.എഫ് ബന്ധം, പൊന്നാനി, ലാവ്‌ലിന്‍ കേസ്, മന്‍മോഹന്‍ സിങ്ങിനാണോ അദ്വാ‍നിക്കാണോ പ്രായക്കൂടുതല്‍, ഇന്ത്യ ഇസ്രായേല്‍ ബന്ധം, അമേരിക്കന്‍ സാമ്രാജ്യത്വം, പാലസ്തീന്‍ വിഷയത്തില്‍ നമ്മുടെ നിലപാട് എന്താവണം, രാമസേതുവിനെ ദേശീയ പൈതൃകമാക്കണമോ, സിബിഐയും കോടതിയും ചില രാഷ്ട്രീയപാര്‍ട്ടിയുടെ ചട്ടുകമോ തുടങ്ങിയ എത്രയെത്ര മനോഹര വിഷയങ്ങളാണ് അവര്‍ നമ്മുടെ മുമ്പില്‍ അവതരിപ്പിച്ചത് ! ഹോ...അപാരഭാവനകള്‍ തന്നെ. ഏതുപാര്‍ട്ടിയാണ് ഇക്കാര്യത്തില്‍ മോശം?

ഇതുകൂടാതെ സീറ്റു തര്‍ക്കങ്ങള്‍, സീറ്റുകിട്ടാത്തവരുടെ പടലപ്പിണക്കങ്ങള്‍, മറുകണ്ടം ചാടലുകള്‍ തുടങ്ങിയ നാടകങ്ങളും ഇഷ്ടം പോലെ കാണുവാന്‍ നമുക്ക് ഭാഗ്യമുണ്ടായി. ലൈവായി അതൊക്കെ നമ്മുടെ വീടുകളിലെത്തിച്ച ടി.വി ചാനലുകള്‍ക്ക് ഈ അവസരത്തില്‍ നമുക്ക് നന്ദിപറയാം. ജനങ്ങളുടെ സേവകരാകാന്‍ സ്വമേധയാ മനസ്സുള്ള ഇത്രയധികം ആളുകള്‍ നമ്മുടെ നാട്ടില്‍മാത്രമേ ഉണ്ടാവൂ, അതും യാതൊരു പ്രതിഫലവും ഇശ്ചിക്കാതെ. സ്ഥാനാര്‍ത്ഥികളില്‍ പലരുടേയും സാമ്പത്തികസ്ഥിതി അവര്‍ ഇലക്ഷനുവേണ്ടി പരസ്യമാക്കിയപ്പോള്‍ നിങ്ങള്‍ ടി.വി യിലൂടെയും പത്രങ്ങളിലൂടെയും കേട്ടതാണ്. പതിനായിരം രൂപയില്‍ താഴെ ബാങ്കു നിക്ഷേപവും ഒരുപവന്‍ സ്വര്‍ണ്ണവും മാത്രം സ്വന്തമായുള്ള പാവങ്ങളാണ് അധികവും.

വോട്ടുചെയ്യുവാനായി പോകുന്ന നിങ്ങളെല്ലാവരും ജാതിമത ചിന്തകള്‍ക്കതീതമായി ചിന്തിക്കുന്നവരാണെന്നും, മതേതരത്വം എന്ന മഹത്തായ സങ്കല്‍പ്പത്തെ ഉയര്‍ത്തിപ്പിടിക്കുന്നവരുമാണെന്ന് എനിക്കറിയാം. എങ്കിലും ചില മതനേതാക്കന്മാരൊക്കെ അവരവരുടെ ജാതിയില്‍ പെട്ട സ്ഥാനാര്‍ത്ഥികളെ ചില സ്ഥലങ്ങളിലെങ്കിലും മത്സരിപ്പിക്കണമെന്ന് ആവശ്യപ്പെട്ടിരുന്നതായും, അങ്ങനെ ആവശ്യപ്പെടാത്ത സ്ഥലങ്ങളില്‍ പോലും രാഷ്ട്രീയപ്പാര്‍ട്ടികള്‍ സ്വമേധയാ, ഹിന്ദു, മുസ്ലിം, ക്രിസ്ത്യന്‍ വിഭാഗങ്ങളില്‍ പെട്ട സ്ഥാനാര്‍ത്ഥികളെ വിവേകപൂര്‍വം നിര്‍ത്തിയിരിക്കുന്നതായും ചില വാര്‍ത്തകള്‍ പ്രചരിക്കുന്നുണ്ട്. നിങ്ങളതൊന്നും കാര്യമാക്കുകയില്ല എന്നെനിക്കറിയാം. മുന്നണി ഏതായാലും സ്ഥാനാര്‍ത്ഥി നമ്മൂടെ ജാതിയായാല്‍‍ മതി എന്ന ചിന്തയാണ് ഈ അവസരത്തില്‍ നമുക്ക് അഭികാമ്യം. ദേശീയ രാഷ്ട്രീയത്തില്‍ വരാന്‍ പോകുന്ന തൂക്കു ഗവര്‍മെന്റിനെ താങ്ങിനിര്‍ത്തുന്ന നെടുംതൂണുകളിലൊന്നാവാന്‍ സാധ്യതയുള്ള ഒരു മുന്നണിക്ക് വോട്ടുകുത്തിയാല്‍ നിങ്ങളും നിങ്ങളുടെ നാടും രക്ഷപെടുകില്ലേ എന്നു നിങ്ങളില്‍ ചിലര്‍ ചിന്തിച്ചേക്കാം. ഇല്ല സുഹൃത്തുക്കളേ, ജയിക്കുന്നവരാരോ “അവര്‍ രക്ഷപെടും“ എന്നതാണ് ശരി. നാടുനന്നായില്ലെങ്കിലും “നമ്മുടെ കൂട്ടത്തിലൊന്ന്“ നന്നായികിടക്കട്ടെ!

കൂടുതല്‍ എഴുതി നിങ്ങളുടെ വിലയേറിയ സമയം മെനക്കെടുത്തുന്നില്ല കൂട്ടരേ. തമാശമതിയാക്കി ഇനി കാര്യത്തിലേക്ക് വരാം. കണ്ണടച്ചുവോട്ടുചെയ്യാതെ കണ്ണുതുറന്നുവോട്ട് ചെയ്യുക എന്നുമാത്രമേ നിങ്ങളെ ഈ വേളയില്‍ എനിക്ക് ഓര്‍മ്മിപ്പിക്കുവാനുള്ളൂ. ജനാധിപത്യം എന്നത് മഹത്തായ ഒരു സങ്കല്‍പ്പമാണ് - അത് നന്നായി കൈകാര്യം ചെയ്യാന്‍ പ്രബുദ്ധതയുള്ള ഒരു ജനതയുടെ കൈകളില്‍. തങ്ങളുടെ അവകാശങ്ങള്‍ എന്തെന്ന് പൂര്‍ണ്ണബോധ്യമുള്ള ഒരു സമൂഹത്തിന്‌‍. ഇല്ലെങ്കില്‍ ജനങ്ങള്‍ ഒരുതരം അടിമകളും തെരഞ്ഞെടുക്കപ്പെട്ടവരും അവരെ സഹായിക്കുന്ന ഉദ്യോഗസ്ഥവൃന്ദവും ഭരിക്കാനുള്ളവരും ആയിപ്പോകും.

ലോകത്തെ ഏറ്റവും വലിയ ജനാധിപത്യ രാജ്യം എന്നുപറയുന്നതിനേക്കാള്‍ അഭിമാനകരമാണ് ലോകത്തെ ഏറ്റവും നല്ല ജനാധിപത്യബോധമുള്ള ജനതതി എന്നുപറയുന്നതാണ് എന്നറിയാമല്ലോ. അതിനായി എല്ലാവരും തങ്ങളുടെ വോട്ടവകാശം ഉപയോഗിക്കേണ്ടതുണ്ട്. അന്‍പതോ അറുപതോ ശതമാനം വോട്ടര്‍മാര്‍ മാത്രം പോളിംഗ് ബൂത്തുകളില്‍ എത്തുകയും അതില്‍ പകുതിയുടെ ഭൂരിപക്ഷത്തില്‍ ജയിക്കുകയും ചെയ്യുന്നവര്‍ ഒരു മണ്ഡലത്തിന്റെ പ്രതിനിധി ആകുന്നതെങ്ങനെ? രാഷ്ട്രീയക്കാരുടെ പ്രവര്‍ത്തനങ്ങളില്‍ മടുത്ത് നമ്മുടെ മനസില്‍ വളര്‍ന്നുവരുന്ന വെറുപ്പ് അരാഷ്ട്രീയതയാണ്‌‍, അത് തെറ്റാണ്. അരാഷ്ട്രീയമനസ്ഥിതി തീര്‍ച്ചയായും ഒരു ജനാധിപത്യ രാജ്യത്തിന് നല്ലതല്ല. അതിനാല്‍ ഈ ഇലക്ഷന്‍ ദിനത്തിലെങ്കിലും എന്റെ കേരളനാട്ടിലെ 100% വോട്ടര്‍മാരും പോളിംഗ് ബൂത്തുകളിലെത്തി നിങ്ങള്‍ക്ക് ലഭിച്ചിരിക്കുന്ന ഈ അവകാശം, ഒരു ദിവസത്തേക്ക് മാത്രമാണെങ്കില്‍ കൂടി, വിവേചനപൂര്‍വം വിനിയോഗിക്കണമെന്ന് അഭ്യര്‍ത്ഥിച്ചുകൊണ്ട് നിര്‍ത്തുന്നു...

ജയ് ഹിന്ദ്.

ബ്രേക്കിംഗ് ന്യൂസ് - പുലിയിറങ്ങി

2009-04-01T07:52:00.003+05:30

ഞാന്‍ ജീവിതത്തിലാദ്യമായി ഒരു ടി.വി വാര്‍ത്തകാണുന്നത് 1985 ല്‍ ജോണ്‍ പോള്‍ രണ്ടാമന്‍ മാര്‍പ്പാപ്പ കേരളം സന്ദര്‍ശിച്ച അവസരത്തിലാണ്. അന്നു ഞാന്‍ പത്താം ക്ലാസില്‍ പഠിക്കുന്നു. വീട്ടില്‍ നിന്ന് അല്പം ദൂരെയുള്ള പാപ്പാടിക്കോയിക്കല്‍ എന്ന വീട്ടില്‍ അന്ന് ടി.വി യുണ്ട് - അതും കളര്‍ ടി.വി! ഞങ്ങളുടെ ഗ്രാമത്തില്‍ ആദ്യമായി ഒരു വീട്ടില്‍ ടി.വി. വാങ്ങിയതും അവിടെയാണെന്ന് തോന്നുന്നു. ദൂര്‍ദര്‍ശനിലെ കണ്ണനും ഹേമലതയും ചേര്‍ന്ന് ആ വാര്‍ത്ത അവതരിപ്പിച്ചത് ഇപ്പോഴും ഞാന്‍ നന്നായി ഓര്‍ക്കുന്നു.

ഞങ്ങളുടെ ഒരു അയല്‍വീട്ടില്‍ ടി.വി എത്താന്‍ പിന്നെയും രണ്ടുവര്‍ഷം കഴിഞ്ഞു; കുട്ടപ്പക്കുറുപ്പ് സാറിന്റെ വീട്ടില്‍. അന്നൊക്കെ ആകെ ഒരു ചാനലേ ഉള്ളൂ. ദൂരദര്‍ശന്റെ മലയാള പ്രക്ഷേപണം വൈകിട്ട് അഞ്ചുമുതല്‍ രാത്രി 8:30 വരെ. ശനിയാഴ്ച വൈകുന്നേരങ്ങളില്‍ ആ വീടും പരിസരവും ജനങ്ങളെക്കൊണ്ട് നിറയും, സിനിമ കാണാന്‍. വീട്ടുകാരെല്ലാം മിക്കവാറും പുറത്തും! അതുപോലെ ഞായറാഴ്ച രാവിലെ ഒന്‍പതരയ്ക്കും ഇതുപോലെ തിരക്കോടു തിരക്ക്. രാമായണം കാണുവാനായി പരിസരത്തുള്ള വീടുകളില്‍ നിന്ന് ആബാലവൃദ്ധം ജനങ്ങള്‍ അങ്ങോട്ടൊഴുകയായി! പിന്നെയും വര്‍ഷങ്ങള്‍ക്കു ശേഷം ഞാന്‍ ഡിഗ്രിക്ക് അവസാന വര്‍ഷം പഠിക്കുന്ന കാലത്താണ് ഞങ്ങളുടെ വീട്ടില്‍ ഒരു ടി.വി വാങ്ങിയത്.

ഇന്ന് കേരളത്തിലെ എല്ലാ വീട്ടിലും ടി.വി വന്നു. പത്തും പതിനഞ്ചും മീറ്റര്‍ ഉയരത്തില്‍ വീടുകള്‍ക്കുമുയരത്തില്‍ നിന്നിരുന്ന ടെറസ്ട്രിയല്‍ ആന്റിനകള്‍ അപ്രത്യക്ഷമായി, ഡിഷ് വന്നു. ഇപ്പോള്‍ എല്ലായിടത്തും കേബിള്‍ ടി.വിയുമായി. മലയാളത്തില്‍ മാത്രം ചാനലുകള്‍ പത്തിനുമുകളില്‍. ആയിരത്തിത്തൊള്ളായിരത്തി എണ്‍പതുകളിലെ സാങ്കേതികത്തികവിനേക്കാള്‍ ടി.വി പ്രോഗ്രാമുകളിലും ടെക്നോളജിയിലും വന്‍ പുരോഗതിതന്നെ നമ്മുടെ ചാനലുകള്‍ക്കും ടി.വി കള്‍ക്കും ഉണ്ടായി എന്നതില്‍ യാതൊരു സംശയവുമില്ല. എന്നാല്‍ നമ്മുടെ ന്യൂസ് ചാനലുകളുടെ പ്രവര്‍ത്തന സംസ്കാരത്തില്‍ ഈ ഉന്നമനം കാണുന്നില്ല എന്നത് അങ്ങേയറ്റം ഖേദകരമാണെന്ന് പറയേണ്ടിയിരിക്കുന്നു.

ചാനലുകള്‍ തമ്മിലുള്ള പരസ്പര മത്സരം, ഒരാളെക്കാള്‍ മുമ്പില്‍ ഒരു വാര്‍ത്ത ജനങ്ങളിലേക്ക് (?) എത്തിക്കുവാനുള്ള ത്വര, വാര്‍ത്തകള്‍ക്കുള്ളില്‍ ചികഞ്ഞുപെറുക്കി സെന്‍സേഷനല്‍ ന്യൂസുകള്‍ കണ്ടെത്താനുള്ള ആക്രാന്തം ഇതൊക്കെയാണ് ഇന്നു നമ്മുടെ വാര്‍ത്താ ചാനലുകളില്‍ ജോലി ചെയ്യുന്ന ചെറുപ്പക്കാരായ ജേര്‍ണലിസ്റ്റുകള്‍ക്കുള്ളതെന്ന് പറയാതിരിക്കാനാവുന്നില്ല. ഒപ്പം ജേര്‍ണലിസ്റ്റായതിനാല്‍ പരിധികളില്ലാത്ത സ്വാതന്ത്ര്യമുണ്ടെന്ന വിശ്വാസവും! അതിനായി അവര്‍ എന്തും ചെയ്യും, എന്തും ചോദിക്കും, എവിടെയും കൈകടത്തും. ആവശ്യക്കാരന് ഔചിത്യം വേണ്ട എന്നാണല്ലോ പ്രമാണം.

ഇത്രയും എഴുതാന്‍ കാരണം മിനിഞ്ഞാന്ന് ഏഴെട്ടുമണിക്കൂറോളം കേരളത്തെ അക്ഷരാര്‍ത്ഥത്തില്‍ മുള്‍ മുനയില്‍ നിര്‍ത്താന്‍ ഇടയാക്കിയ ഭീകരാക്രമണ ഭീ‍ഷണിയെ നമ്മുടെ ചാനലുകള്‍ ഒരു വന്‍ ആഘോഷമാക്കി മാറ്റിയതുകണ്ടതുകൊണ്ടാണ്. ഇതിനു മുമ്പും ഇതേ വിഷയത്തില്‍ ഈ ബ്ലോഗില്‍ ഞാന്‍ പ്രതികരിച്ചിട്ടുണ്ട്. അതിനാല്‍ കൂടുതല്‍ എഴുതുന്നില്ല. ഒരു ചാനല്‍ ബ്രേക്കിംഗ് ന്യൂസായി പുലികള്‍ കേരളത്തില്‍ ഇറങ്ങിയതായി സംശയം പ്രകടീപ്പിച്ചപ്പോള്‍, മറ്റൊരുകൂട്ടര്‍ പുലി ഇറങ്ങിയെന്നു തന്നെ വിധിയെഴുതി. ഒരു ഇന്റലിജന്‍സ് റിപ്പോര്‍ട്ട് കിട്ടിക്കഴിയുമ്പോള്‍ പോലീസും, കമാന്റോകളും, മറ്റു സെക്യൂരിറ്റ് ഡിപ്പാര്‍ട്ട്മെന്റുകളും അതന്വേഷിക്കുകയും വേണ്ട നടപടികള്‍ സ്വീകരിക്കുകയും ചെയ്യും എന്നത് സ്വാഭാവികമായി ലോകത്തെവിടെയും ചെയ്യപ്പെടുന്ന അവരുടെ ഡ്യൂട്ടിയാണ്. അവരുടെ പുറകേ ക്യാമറയുമായി ഓടി നടന്ന് കണ്ണില്‍ കണ്ടതെല്ലാം ക്യാമറയിലാക്കി ലൈവായി വീടുകളിലെത്തിക്കുന്ന പ്രവണതയാണ് എതിര്‍ക്കപ്പെടേണ്ടത്. കൂട്ടത്തില്‍ ന്യൂസ് ഡെസ്കില്‍ നിന്നുള്ള വിഢിച്ചോദ്യങ്ങളും, മണീക്കൂറുകള്‍ നീളുന്ന അര്‍ത്ഥമില്ലാത്ത ചര്‍ച്ചകളും.

ബോംബെ ഭീകരാക്രമണവേളയില്‍ ടി.വി ചാനലുകള്‍ ഈ രീതിയില്‍ പ്രതികരിച്ചത് വന്‍ പ്രതിഷേധത്തിന് ഇടയാക്കിയതാണ്. എന്നിട്ടും ഇക്കൂട്ടര്‍ പഠിക്കുകയില്ലെന്നു വച്ചാല്‍ വലിയ കഷ്ടംതന്നെ. ജനാധിപത്യവ്യവസ്ഥിതിയുടെ കാവല്‍ക്കാരില്‍ ഒരാളാകേണ്ട മാധ്യമക്കൂട്ടം, ജനങ്ങളെ ഭീതിയിലാക്കുന്ന രീതിയിലും, രാജ്യസുരക്ഷയെത്തന്നെ അപകടപ്പെടുത്തുന്ന രീതിയിലും പ്രതികരിച്ചാല്‍ അതിനു തടയിടേണ്ടത് നിയമമുണ്ടാക്കേണ്ട ജനപ്രതിനിധികള്‍ തന്നെ.

വാര്‍ത്തകള്‍ ജനങ്ങളിലെത്തിക്കേണ്ടത് അത്യാവശ്യം തന്നെ. പക്ഷേ അതിനും ഒരു സംസ്കാരം വേണം, പെരുമാറ്റച്ചട്ടങ്ങള്‍ വേണം. ഇടംവലം നോക്കാതെ കാടടച്ചു വെടിവയ്ക്കുന്നതിലും കാളപെറ്റു എന്നുകേള്‍ക്കുമ്പോള്‍ കയറെടുക്കുന്നതിലുമല്ല കാര്യം, യാഥാര്‍ത്ഥ്യബോധത്തോടെ, ഉത്തരവാദിത്തത്തോടെ സ്ഥിതിഗതികള്‍ പഠിച്ച് നല്ലരീതിയില്‍ ഒരു ന്യൂസ് അവതരിപ്പിക്കുന്നതാണ് ഒരു ന്യൂസ് ചാനല്‍ ചെയ്യേണ്ടത്. റേഡിയോയില്‍ ഒരു വാര്‍ത്ത കേള്‍ക്കുന്നതും, ടി.വിയില്‍ ഒരു വാര്‍ത്ത കാണുന്നതും തമ്മില്‍ വലിയ വ്യത്യാസമുണ്ട്. ഈ അവസരത്തില്‍ ആകാശവാണിയുടെയും, ദൂരദര്‍ശന്റെയും പണ്ടത്തെ വാര്‍ത്തകള്‍ ഓര്‍ത്തുപോകുന്നു. വെറും നോസ്റ്റാള്‍ജിക് ഓര്‍മ്മയല്ല. കാര്യമാത്രപ്രസക്തങ്ങളായിരുന്നു അവ, അതുകൊണ്ടുതന്നെ.

**********************

ഏഴുമണിക്കൂറിനുശേഷം: ബ്രേക്കിംഗ് ന്യൂസ്

സംശയകരമായ സാഹചര്യത്തില്‍ കണ്ടെത്തിയ ബോട്ട് തൈക്കല്‍ സണ്ണി എന്നയാളുടേതാണെന്ന് സ്ഥിരീകരിച്ചു. വലിയ ഒരു ബോട്ടില്‍ നിന്ന് ഡീസല്‍ ക്യാനുകളും മത്സ്യബന്ധന ഉപകരണങ്ങളും ചെറിയ ഒരു ബോട്ടിലേക്ക് മാറ്റിയാതാണ് സംശയത്തിനിടയാക്കിയത് !! ശുഭം!

ഇനി അടുത്ത സെന്‍സേഷനല്‍ വാര്‍ത്ത തേടി അവര്‍ യാത്രയാകുന്നു!

ഒരു ഗായകനെ പരിചയപ്പെടുത്തുന്നു

2009-02-26T16:16:00.003+05:30

കൂട്ടുകാരേ,

ഒരു പുതിയ ഗായകനെക്കൂടി ബൂലോകത്തിനു പരിചയപ്പെടുത്തട്ടെ.

ചിരിപ്പൂക്കള്‍ എന്ന ബ്ലോഗിന്റെ ഉടമ, നിരഞ്ജന്‍ എന്ന ബ്ലോഗര്‍ ഐഡിയില്‍ ബ്ലോഗ് എഴുതുന്ന എന്റെ രണ്ടാമത്തെ അനുജന്‍ ഷിനു.

ഷിനു ശാസ്ത്രീയമായി സംഗീതം അഭ്യസിച്ചിട്ടുള്ള ആ‍ളല്ല. എങ്കിലും സംഗീതത്തിലുള്ള വാസനയും താല്പര്യവുമൂലം സ്കുള്‍, കോളേജ് തലം മുതല്‍ തന്നെ മത്സരവേദികളില്‍ പാടിയിട്ടുണ്ട്. ഇപ്പോള്‍ സൌദി അറേബ്യയിലെ ദമാമില്‍ ജോലി ചെയ്യുന്നു. ഷിനു ആദ്യമായി ഒരു പോഡ്‌കാസ്റ്റ് ബ്ലോഗില്‍ പരീക്ഷിക്കുകയാണ്. “അന്തിവെയില്‍ പൊന്നുതിരും ഈറന്‍ സ്വപ്നവുമായ്“ എന്ന ഗാനം കരോക്കെയുടെ അകമ്പടിയോടെ പരിമിതമായ സൌകര്യങ്ങളില്‍ റിക്കോര്‍ഡ് ചെയ്ത് അപ്‌ലോഡ് ചെയ്തിട്ടുണ്ട്. കേട്ടിട്ട് അഭിപ്രായങ്ങള്‍ അറിയിക്കൂ.

നിരഞ്ജന്റെ പോസ്റ്റിലേക്കുള്ള ലിങ്ക് ഇവിടെ

സ്നേഹപൂര്‍വ്വം
അപ്പു

കൈപ്പള്ളിയുടെ നവരസങ്ങള്‍

2009-02-21T21:25:00.006+05:30

യു.എ.ഇ ബൂലോഗത്തിലെ സജീവ സാന്നിദ്ധ്യമായ കൈപ്പള്ളി, ഇന്നലെ (ഫെബ്രു 20) നടന്ന ബ്ലോഗ് മീറ്റിന്റെ നടത്തിപ്പിലും മുമ്പില്‍ത്തന്നെയുണ്ടായിരുന്നു. ചര്‍ച്ചകള്‍ക്കുള്ള വിഷയങ്ങള്‍ ഉണ്ടാക്കുന്നതിലും, അതില്‍ ഒരു മോഡറേറ്ററായി പെര്‍ഫോം ചെയ്യാനും കൈപ്പള്ളിക്ക് പ്രത്യേക കഴിവുതന്നെയുണ്ട്.

ഓരോ സംഭാഷണത്തേയും സ്വതസിദ്ധമായ ഒരു ആംഗ്യഭാഷയോടു ചേര്‍ത്തുകൊണ്ടുമാത്രമേ കൈപ്പള്ളി സംസാരിക്കാറുള്ളൂ. എനിക്ക് വളരെ രസകരമായി തോന്നിയിട്ടുള്ള ആ ഭാഷ - കണ്ണും, കൈയ്യും, മുഖഭാവങ്ങളും ഒത്തൊരുമിക്കുന്ന ആ ആംഗ്യഭാഷ - യില്‍നിന്ന് ചിലരംഗങ്ങള്‍ ക്യാമറയിലൂടെ ഒപ്പിയെടുത്തത് ഇവിടെ പങ്കുവയ്ക്കുന്നു - വെറുതെ ഒരു തമാശ. രസകരമായ അടിക്കുറിപ്പുകള്‍ക്ക് സ്വാഗതം!

ഈ ചിത്രങ്ങള്‍ ഒരു പിക്കാസ വെബ് ആല്‍ബത്തില്‍ നല്‍കുന്നു. ലിങ്ക് ഇവിടെ

കമന്റുകള്‍ ചിത്രങ്ങളുടെ അടിയിലായി ആല്‍ബത്തില്‍ തന്നെ രേഖപ്പെടുത്താവുന്നതാണ്.

---------------------------
ചില സാമ്പിള്‍ പടക്കങ്ങള്‍‍:
---------------------------

അപ്പൂന്റെ ലോകം

അങ്കിളിനു സ്നേഹപൂർവം.....

ഹർത്താൽ ദിന ചിന്തകൾ

ചാനൽ വടംവലിയും ഒടിഞ്ഞ കപ്പും

“ജ്വാലകൾ-ശലഭങ്ങൾ“ പുസ്തക പ്രകാശനം

09-09-09 : ദുബായ് മെട്രോ ഭാവിയിലേക്ക് ....

ഇന്ത്യന്‍ എക്സ്പ്രസില്‍ ‘ജ്വാലകള്‍’

ചെറായി ഹ..ഹ..ഹ - ഒരറിയിപ്പ്

ഡെപ്ത് ഓഫ് ഫീൽഡ് - ഭാഗം 1

സ്വപ്നങ്ങൾ ഈണങ്ങളായ കഥ .....

അഭയക്കേസും വീഡിയോ ടേപ്പ് ‘കട്ടിംഗും’

വീണോളൂ...പക്ഷേ എഴുനേല്‍ക്കണം !

കേരളത്തിലെ വോട്ടറന്മാര്‍ക്ക് ഒരു തുറന്ന കത്ത്

ബ്രേക്കിംഗ് ന്യൂസ് - പുലിയിറങ്ങി

ഒരു ഗായകനെ പരിചയപ്പെടുത്തുന്നു

കൈപ്പള്ളിയുടെ നവരസങ്ങള്‍

പ്രവാസിക്കോരനു പിന്നെയും കുമ്പിളില്‍ കഞ്ഞി

നല്ലൊരു ഫോട്ടോഗ്രാഫര്‍

സന്തോഷപൂര്‍വ്വം മൂന്നാം വര്‍ഷത്തിലേക്ക്

കമന്റു ചെയ്യാന്‍ ‘ഭയം’

ഗാസയിലെ കുഞ്ഞുങ്ങള്‍ക്ക്

അതിര്‍ത്തിയില്‍ പടയൊരുങ്ങുമ്പോള്‍

ക്യാമറ T-stop കളും എക്സ്പോഷറും

വാര്‍ത്തകളുണ്ടാക്കുന്ന മാധ്യമങ്ങളും പട്ടിവിളി വിവാദവും

നമ്മുടെ സ്കൂള്‍ സിലബസുകള്‍ കുട്ടികള്‍ക്ക് തലവേദനയാകുന്നുണ്ടോ?

കാഷ്വാല്‍റ്റികള്‍ ആഘോഷമാക്കുന്ന മാധ്യമസംസ്കാരം

ചന്ദ്രനിലേക്കൊരു യാനം Chandrayan 1

വെള്ളച്ചാട്ടം (ഫോട്ടോ)

ഒരു സന്തോഷവാര്‍ത്തകൂടി !!

തമനുച്ചായന് കുഞ്ഞുപിറന്നു

പൂച്ച ... പൂച്ചേയ്...... (ചിത്രങ്ങള്‍)

പിന്നെയും കുറെ കുഞ്ഞിപ്പൂക്കള്‍

സഹ്യന്റെ മടിയിലൂടെ ഒരു യാത്ര - ഭാഗം 3

പൂക്കളം (കുട്ടിക്കവിത)

മനുക്കുട്ടന്റെ അവധിക്കാല ചിത്രങ്ങള്‍

കുറെ മഴച്ചിത്രങ്ങൾ